Van Gaal-a beisei chhun FA Cup Zaninah West Ham Vs Manchester United

Club lian an tam tak avang-in inelna hrim hrimah champion a harsa a, knockout hmanga football inelna upa ber FA Cup hlutna a sang tual tual. Sir Alex Ferguson awm loh hnua tlakchhiat lam pan Manchester United-in tun season-ah cham-pion-na hun ṭha an nei a, amaherawhchu West Ham Uni-ted paltlang a awlsam dawn lo.

Zanin dar 11:30 hian Louis van Gaal-a hoten Upton Park-ah West Ham nen FA Cup quarterfinal replay an khel dawn a, Old Traford-ah 1-1 a an inhnehtawk avangin Hammers dinhmun a ṭha zawk niin a lang.

Mualpho leh hmingṭha

Kartawp Premier League inkhelah Red Devils leh Ham-mers in champion beisei an tum ve ve a, an result hlawhchhuah a inang lo.

Manchester United-in White Hart Lane-ah Tottenham Hotspurs an tlawh a, goal thum an chhuah bakah goal an khung ve loh avangin Spurs-in champion beiseina an nei chhunzawm a, Red Devils an mualpho bawk.

Upton Park-ah West Ham-in Arsenal an mikhual a, London Derby-ah team lian zawka ngaih Gunners-in goal hnih khung hmasa mah se Andy Carroll-a hattrick hmangin an lehthal. Arsene Wenger hoten an siphurh rawn sut leh hram mah se minute 90 a ral chuan Slaven Bilic-a hote an hmingṭha a, Arsenal champion beiseina an tihtawp sakah a ngaih theih bawk.

Intawnna hmasa

Old Trafford-ah Dimitri Payet chu sawi zui tlak a ni a, Hammers midfielder hian freekick aṭangin nalh takin a khung. French midfielder hian goal a khung hmain penalty area-ah tih tluk a ni a, Bilic-a'n penalty hlawhchhuak tura a ngaih laiin Van Gaal erawhin yellow card vawi hnihna a chawi lo chu mak a ti hle.

Manchester United tan midfielder Marouane Fellaini chu inkhel tikimtu chauh a ni a, Red Devils beiseina siamtu erawh Anthony Martial a ni. French rawlthar hian hun tawp hma minute 7 la awmin siphurh sutna goal a khung a, United tan nomawi pakhat beisei tur a la awm ve zel.

Rooney a dam

Manchester United captain Wayne Rooney chu February thlaa Sunderland an khelh
ṭumin a inhliam a, FA Cup quarterfinal-a West Ham an mikhual ṭumin a inlan lo. England captain hi a dam tawh a, Thawhṭanni zana United U21-in Middlesbrough goal khata an hneh ṭumin darkar khat chhung a inlan.

United-in Tottenham an tlawh hmain Van Gaal-a'n practice-naah Rooney-a'n goal nalh tak a khung thu leh a thiam a theihngilh loh thu sawi mah se Under 21 inelnaah erawh a langsar lo. English striker hian ball a chang meuh lo a, second half-a freekick a pet over tih loh chu langsarin a che lo. United U21 hian Rooney an lakchhuah hnuah Paddy McNair goal hmangin hnehna an chang.

Zan Special

West Ham hian season thar aṭangin stadium thar an hmang dawn a, FA Cup semifinal hi Wembley Stadium-a khelh a nih dawn vangin zanin hi Boleyn Ground (Upton Park) a FA Cup an khelh hnuhnun berna tur a ni.

FA Cup champion tan Europa League a khelh theih nghal avangin team pahnih tan tun ṭuma an inkhel tur hi a pawimawh hle. Zanina chak zawk hian semifinal-ah Everton an hmachhawn dawn a, inkhel pakhat zawkah Crystal Palace leh Watford an inkhel dawn bawk. Manchester United leh West Ham tih loh semifinalist dang pathum hi chu league table-ah 10-na hnuai lam vekah an awm.

A pawimawh

Manchester United boss Louis van Gaal chuan, "Kan champion theih chhun a nih tawh avangin player-te, club, manager leh supporter tan inkhel pawimawh a ni. Kan player-te hian pressure an dawn sawn thiam a ngai a, cup-ah chuan chak vek a ngai, chak loh chuan tlak a ni mai," tiin inkhel pawimawhna a sawi lang.

Dutch manager hian West Ham pawhin chak an mamawh avangin pressure an neih ve tho thu a sawi.

West Ham lamin Arsenal laka hattrick siamtu Andy Carroll chu fitness vangin 100% in a dinhmun a chiang lo. Hammers boss Bilic chuan, "Medical team chuan Andy Carroll kan chhawr theih nan theihtawp an chhuah a, amah pawhin training-naa a theihna a hmang a, United hmachhawn ngei a duh," tiin a sawi.

Hammers hian Diafra Sa-kho leh Alex Song te an chhawr theih hmel loh avangin Croatian manager chuan Sakho aiah Nigerian striker Emmanuel Emenike a hman rin a ni.