East Bengal head coach-in a ban chhan sawifiah

Pathianni zan I League inkhelah East Bengal-in Sree Kanteerava Stadium-ah mualneitu Bengaluru FC 3-1 in an hneh lo a, champion an beisei ngam tawh lo. Thawhṭanni khan Red and Gold Brigade coach Biswajit Bhattacharya chuan banna a thehlut a, result vang ni loin club chhunga buaina awm vang niin a sawi bawk.

East Bengal head coach bang ta Bhattacharya chuan, "Club chhunga mi ngeiin kan ṭhat lohna tur an ngaihtuah hi ka hrethiam lo. Calcutta Football League kan champion zawha player pahnih khat bakah supporting staff zinga miin player nena kan inkar buaina siam an tum hi a mak a ni. Dressing room-a kan thusawi media lam bulah a ri chhuak fo a, dan tum mah ila tih theih ka nei lo. Coaching lamah hian kum 16 chhung tawnhriat ka nei tawh a, chuvangin ban hun chu ka hria, ka duhthu ngeia bang ka ni," tiin ban a nih loh thu a sawi.

Bengali coach chuan, "Club hotute bulah striker ṭha lei turin ka hrilh a, nasa takin player kan zawng a, a tawpa thutlukna chu Bernard Mendy a ni. Club hotute chuan mamawhna hmun anga chhawr theih a nih thu min hrilh a, an thusawi pawh hi pawm mah ila I League match inkar a zim avangin a ṭhatna angin kan chhawr thei lo a, beisei angin a khel chhuak lo bawk. Hei erawh kan inkar buaina lam a ni lo a, ka hriatthiam loh zawk erawh official ṭhenkhat hmaa kan inbiakna pawh chanchinbu lama chhiar tur awm zel hi a ni," tiin French defender Bernard Mendy nen an inkarah buaina siam tum an awm thu a sawi.

East Bengal chungchang sawiin Bhattacharya chuan, "Official te pawhin media lam hrilh tawh lo turin ti mah ila dan theih an ni lo. East Bengal hi ka club khelhna
ṭhin a nih avangin club chhung ka hrechiang a, hetiang hian tun hmain club chhung a ṭawp ngai lo. Club tana ṭha tur ka duh avangin buaina chhungril tak tak sawi ka tum lo a, East Bengal kal zelna turah duhsakna ka hlan," tiin a sawi.

Red and Gold Brigade-in match hnih khelh hmabak la nei mah se point nga zetin hmahruaitu Bengaluru FC an pha lo a, an champion theih a rinawm tawh loh.