Kobe Bryant-a inkhel en man a to

Basketball legend Kobe Bryant-a'n Ningani zingah basketball court-a a hun hnuhnung ber a hmang tawh dawn a, LA Lakers guard inkhel en man hi £19,315 (Rs. 18,36,582) ten zawrh chhuah a ni!

Kum 37-a upa Bryant hi NBA chanchina score hnem ber pathumna niin Lakers-in Ningani zing dar 8:00 -a Utah Jazz an hmachhawn zawh rualin basketball a chawlhsan tawh dawn a, Bryant-a hun hnuhnung hmuh chak hian ticket an inchuh nasa hle. Lakers hi Western Conference-ah table mawngphahah awmin playoff an khel dawn lo.

Lakers-in Utah Jazz an mikhual-na tur Staples Center-ah hian mi 18,118 chiah an leng a, ticket hi hralh zawh vek tawh niin ticket zawrh chhawn lehna lamah £491 (Rs.46,687) aṭanga £19,315 vel thlenga zawrh chhuah a ni.

LA Lakers chuan an fan-te chu ticket zawrh chhawn an lei duh a nih pawhin club official ticket exchange aṭanga lei turin an rawn a, official exchange aṭanga lei te pawn £7,000 (Rs. 6,65,600) vel tal chu an chawi a ngai dawn tho a, a la tam tham hle.

Hetihlai hian NBA champion lai Golden State Warriors-in Ningani zing dar 8:00-a Memphis Grizzlies an hmachhawnna tur ticket chu £11,155 (Rs.10,60,682)-te'n zawrh chhawn a ni. Golden State Warriors hian hnehna an chang a nih chuan regular season-a vawi 73 chak thei hmasa ber an ni dawn a ni.

Warriors hian kum 1995-96 a Michael Jordan-a ho a Chicago Bulls-in regular season-a chak hnem ber record an lo siam tawh chu khum an tum a, he inkhel en duh hian mipui 19,595 lenna Oracle Arena-a ticket te chu hralh zawh vek a ni tawh.