Guardiola leh Bayern hmaah Benfica

Pep Guardiola-a'n season thar aṭangin Manchester City a enkawl dawn a, Champions League-a Barcelona vawi hnih champion pui tawhtu Spanish manager hian German club hi nomawi nena chhuahsan a duh.

Zanin dar 12:15 hian Estádio da Luz-ah Benfica-in German champion Bayern an mikhual dawn a, Ten Sports-ah pekchhuah a ni ang. Allianz Arena-ah Portuguese club-in away goal an nei lo a, team pahnih dai danna chu first leg minute hnihna leka Arturo Vidal goal chauh niin chak chiang an la awm lo.

Treble champion?

Guardiola-a'n German club a zawm hma season-ah Jupp Heynckes kaihhruaina hnuaiah Bayern-in Champions League, Bundesliga leh DFB Pokal ah te nomawi an chawi a, treble champion an ni.

Spanish manager hnuaiah Bayern-in game thar hlak khel mah se nomawi chawi kawngah season khat chhunga Heynckes-a record an tluk thei lo. Bundesliga-ah Bayern hi ṭum hnih champion zui mah se Champions League lamah semifinal an kal pel thei lo.

Tun season-ah Bayern hi match nga chiah khelh tur la awmah anmahni hnaih bertu Borussia Dortmund-in point sarih laiin an pha tawh lo. Guardiola hian Germany-a a cham chhungin Bundesliga-ah a champion vek dawn a, German Cup semifinal-ah Werder Bremen an la hmachhawn dawn bawk. Barcelona coach hlui hian German club hi treble champion nen a chhuahsan thei ang em tih hi hunin a hril ang.

Beisei nei Benfica

Benfica midfielder Pizzi chuan, "Minute ṭantir aṭanga a tawp thlengin theihtawp kan chhuah ang. Estadio da Luz-ah hi chuan boruak dang daih a awm a, min ṭantute hian minti phur thei a, engpawh a la thleng thei a ni," tiin beisei an neih thu a sawi.

Portuguese club hian kum 1990 hnuah semifinal an thleng tawh lo a, Bayern erawhin hnehna an chang a nih chuan a zawnin kum nga chhungin a sang pali zingah an tel ang.

Rui Vitoria hote hian Inrinni khan Academica Coimbra chu 2-1 in an hneh a, Primeira Liga-ah point hnihin hma an hruai chhunzawm zel. Benfica tana chanchin lawmawm lo chu tun sea-son-a goal 32 khung tawh an club top scorer ni mek Jonas chu hrem vangin an chhawr thei dawn lo.

Bayern lam

German club-in inhliam thar lam an nei lo - Medhi Benatia, Arjen Robben leh Holger Badstuber te erawh an la chhawr thei lo chhunzawm zel.

Bayern captain Philipp Lahm chuan, "First leg-ah kan fimkhur tawk lo a, tun aia dinhmun ṭha zawka awm thei tur kan ni. Benfica kha pressure kan pe na tawk lo a, kan ball pet a dik tawk lo a, kan thutlukna siam a dik lo zeuh zeuh bawk. Kan insiamṭhat a ngai a, kan insiamṭhat ran a ṭul a ni," tiin a sawi.