Dortmund tan Haaland leh Reyna

Bundesliga thlasik chawlh a zo a, German football-a inelna sang ber ṭan a ni leh tawh. Zanin dar 8:00 hian Borussia Dortmund-in WWK Arena-ah Augsburg an lenchilh dawn a, Dortmund player thar Erling Braut Haaland leh rawlthar duhawm Gio Reyna vangin en a chakawm hle.

Bayern Munich chetchhiat season-ah Dortmund hian an hmelma hi point thumin an pha lo a, palinaah an awm mek. Norwegian striker Erling Haaland hoin dinhmun ṭha zawka awm an tum dawn. Kum 19 mi Haaland hian January thla tir khan German club hi a zawm a, thlasik chawlh lai a nih avangin competitive match-aa a la inlan lo.

Friendly match-ah erawh Haaland hi Mainz nen January 11-a friendly match an neih ṭumin second half aṭangin a inlan a, Norwegian striker-in hming chherna hun ṭha a nei turin ball ṭha hmu tam lo mah se a chance neih chhunah erawh a khung teuh hle. Haaland hi Molde aṭanga chawr chhuak niin nikum January khan Salzburg a zawm a, Austria top division-ah match 14 lekah goal 16 a khung bakah Champions League group stage-ah goal riat zet a khung.

Haaland-a pa Alf-Inge Haland pawh footballer tho niin Manchester City tana a khelh laiin April 2001 khan Roy Keane-a’n a tlawh lui a, a lar phah hle. Haaland erawh goal khung hmangin a hming a chher a, 2019 FIFA U-20 World Cup-ah khan Honduras U20 lakah goal kua zet a khung. Bundesliga-ah eng nge a an zel dawn tih chu hunin a hril ang.

Dortmund-in friendly match-a Feyenoord an hneh ṭumin Giovanni ‘Gio’ Reyna-a’n goal a khung a, American rawlthar chanchin hian sawi a hlawh zui. Manager Lucien Favre chuan first team-ah tel tur thu a tichiang tawh a, kum 17 mi lek a nih avangin hmabak êng tak a nei. Reyna hi United States legend Claudio Reyna fapa a ni a, a khelh dan hmangah Kaka nena khaikhin a ni. Bundesliga inkhel dangah hmahruaitu RB Leipzig-in Union Berlin an mikhual dawn a, Pathianni zanah Bayern Munich-in Hertha Berlin an tlawh bawk ang.