A Surin Ngén mu Sur Sung Sung

Boxing chu ni se la pawn lama awm ten towel var an vawm lut ang a, tlaia ṭhianho inkhel chu ni se la an inthlanpawlh daihin a rinawm - Arsenal leh Sheffield United te inkhel a inthlau takzet - puitling leh naupang inkhel ang chauh an ni.

Gunners-in Sheffield United lakah ngenmu an surtir a, an duh ang tawka inkhel thunun chungin an mikhualna ramah 6-0 in hnehna an chang - Mikel Arteta nauten Premier League champion an tum ruh hle.

Arsenal hian EPL match 27 aṭangin point 61 an hmu, khelh zat inangah Liverpool chu point hnihin an phak lo - champion lai Manchester City nen an inkarah point khat a awm bawk, khelh hmabak match 11 ṭheuh an la nei.

Tun kar tawpah Reds leh Man City an intawng dawn, hetih lai hian Arsenal chuan Brentford an mikhual thung a, match khat khelh fuh leh tihsual zeuhah an dinhmun hi a la inthlak kual vek thei - a ngaihnawm takzet dawn!

Laipui a puak

Goal khung harsat vanga buai khan an buaina an chingfel a, an khung ta malh malh mai. Bramall Lane-a inkhelah Mikel Arteta-a'n a player neih ṭhat a chhawr, a hma lamah Kai Havertz, Bukayo Saka leh Gabriel Martinelli te an intlar.

Arsenal hian Premier League mawngphah lakah zahngaihna an lantir lo. Minute 13 an khelh chuan goal thum an khung der tawh - Declan Rice-a cross chu lo tawk per zeuh hman mah se box laia awm Martin Odegaard chuan a khung ṭan.

Mual sira hlauhawm reng mai Saka-a'n harsa taka a cross chu defender Jayden Bogle chuan anmahni lamah a tilut palh a, chawlhlawk hmain Gabriel Martinelli, Kai Havertz leh Rice ten an khung belh, chawlhlawk hman laiin Sheffield an zawr fel tawh.

Saka-a'n goal khung lo mah se amah vangin goal khat an khung hnuah Rice tan a siamsak zui a, tun hnaia harhtharna chang Havertz pawhin ball kang a dawn chu tawih zeta la thlain, defender Ben White tana khung nuam tawk chiahin a siamsak.

An puitling

Hun tawp dawna goal hmangin Liverpool an chak a, chumi hnuah Manchester City chuan Manchester United an hneh leh bawk, an elpui club lian pahnih result hresa chungin Arsenal hi an inlan, boruak zam velah an buai lo tih a takin an lantir.

Inkhel ṭan aṭanga minute 22 chhungin goal khung tuma 'shot' vawi 10 an nei hman a, first half thleng khan ball possession 80% an nei tling hial. Khualmuala league match an khelh hnuhnung pathumah goal nga an khung tling vek, hetiang tithei awmchhun hi an ni hial.

Arsenal manager Arteta chuan, "Sheffield United khelmual hi inkhelh harsatna hmun a ni, chu hmunah ngei chuan na taka goal nawr chungin hnehna kan chang thei. Goal khung leh hnehna chan châka kan tuihal kha a hmuhnawm takzet.

"Theihna kan nei a, a pawimawh ber chu kan duh ang taka khel reng thei tura kal fuh a ni," a ti. Bench aṭangin striker Gabriel Jesus a lut thei tawh a, ke dinglam hliam vanga Martinelli lak chhuah a ngai kha an lawm lohna awmchhun a nih mai a rinawm.

Blades tla dawn?

Tuna a lan dan chuan Sheffield United hian season tharah Premier League an khelh chhunzawm theih a rinawm ta lo, point 13 chauh an la hmuh avangin a him china awm Nottingham Forest an phak lohna chu point 11 ngawt a tling ta.

Goal 72 tehmeuh an chhuah tawh a, anmahni dawta goal chhuah tam chu an chung chiaha awm Burnley (60) an ni. Tlarhnung an siamṭha viau a nih ngawt loh chuan inhamtan a huphurhawm takzet, kawng a phui ta vek tihna erawh a la ni bik lo.

Blades manager Chris Wilder chuan, "Ka naute hi 4-5-1 anga remin kan ṭhat pui ṭhin viau, tun ṭumah erawh kha chuan holam tak taka tihsual kan neih khan a goal nghal zel, goal ven kawnga thil hote kan tisual ṭhin hi a pawi lai tak chu a ni.

"Season hrehawm leh harsa tak chu a ni. Player hliam leh chhan dang vanga inkhel thei lo kan nei fo, heng karah hian club dangin min nghak si lo. Hei hi league kalphung chu a ni bawk si," tiin an tan hun harsa a thlen mek thu a sawi.