Man City tlang zan?

Zanin dar 1:30 hian Manchester City chuan Champions League last 16 second leg khel turin Copenhagen an lo mikhual dawn. Pep Guardiola naute hian harsa vak loin Etihad Stadium-ah hnehna an chan theih mai a rinawm.

Copenhagen khelmual Parken-ah Man City hian 3-1 in hnehna an lo chang tawh, an tan tlang turin goal chhuah loh a tawk. Chutihrualin UCL last 16 chin a nih tawh avangin Danish club hi ngaihnep ngawt chi erawh an ni bik lo ang.

Man City hian Premier League-ah Manchester United an hneh hlim hlawl a ni a, kar tawpah Liverpool an lenchilh leh dawn - Guardiola tan chuan zanina player ṭha zawng zawng chhawr fel chu a fuh dawn lo.

Season hmasa khan Citizens hian Premier League, Champions League leh FA Cup an la vek, tun season kal laiah pawh champion leh vek thei dinhmunah an ding mek, chuvangin Pep-a'n mak danglam taka a naute a rem leh a nih pawhin football ngaina leh hrechiang ten mak an ti lo ang.