LB aia huai zawk Khatla TBL

Mizoram Super League (MSL) champion lai Khatla TBL chuan nomawi hum ngei an tum a, kawng dik an zawh. Thawhṭanni zan khan TBL hian semifinal game 1-ah Bungkawn LB Associates chu 98-82 a hnehin best of three series-ah 1-0 in hma an hruai.

Zanin dar 8:00 hian a hmun ngai R. Dengṭhuama Indoor Stadium, Mualpuiah game 2 khelh a ni leh dawn. TBL tan final lut turin vawi khat chak chauh a ngai tawh - Bungkawn LB tan chak loh a thiang tawh lo tihna a ni.

Khatla TBL coach H. Lalhruaitluanga chuan, "League round lama kan intawn khan hliam vangin kan buai deuh a, tunah chuan ka naute pawh an dam ṭha tawh a, game 2-ah hian engkim chinfel kan tum," tiin Vanglaini a hrilh.

League round-ah Bungkawn LB hian Khatla TBL hi an hneh, hemi ṭum hian TBL star player Vanlalṭhazuala a inhliam. Ṭhazuala hi semifinal game 1-ah a inlan thei lo a, mahse a team an chak ta tho.

Hruaia chuan, "Game 1-ah pawh khan mamawh huna chhawr turin squad-ah kan dah, tunah hian 80% a dam tawh. A ṭul a nih chuan game 2 a khel thei tawh ang," tiin Ṭhazuala chungchang a sawi, zaninah an mamawh chuan an chhawr thei dawn tihna a ni.

TBL hian season hmasa lama champion puitu Joshua Aaaron Keys an la nei, ani hian game 1-ah point 48 teh meuh a nei. Bungkawn tan game 2 la tur chuan Keys-a dan theih dan tur an ngaihtuah chhuah a ngai dawn.

Semifinal game 1 thlir chuan Bungkawn hian chak turin theihna an nei ve bawk, an tihfuh lai chuan point ngaa san fal lai pawh an nei. Mahse, hun pawimawhah tawnhriat nei ṭha zawk TBL danglamna a lang leh ṭhin.

Keys-a ang bawkin Bungkawn thiampuipa Gregory Lee Heckstall a che ṭha, point 40 teuhmeuh a nei thei ve tho. State pawn aṭanga player chah luh an nei ṭha a, an danglamna tur chu tualchhung player chet ṭhat leh coach thluak hman dan a ni ang.

Khatla TBL lakah Bungkawn tualchhung player zingah point 10 nei tling thei an awm lo, a vawi khat nana MSL final thlen ngei an duh a nih chuan tualchhung tlangvalte an ṭan zual a ngai dawn a, ball sem dan an thlak hret a ngaiin a rinawm.

Nizan khan Zarkawt BCA leh Champhai District Basketball Association ten semifinal geme 2 an khel, result kan hre hman lo. Game 1-ah BCA hi an chak tawh a, an chak nawn a nih chuan final an lut ang.