Real-in Bellingham red card khinlet an tum
La Liga hmahruaitu Real Madrid chuan Valencia nen an inkhelh ṭuma Jude Bellingham red card chu ngaihtuah ṭhat turin an thlen dawn niin an sawi a, referee thutluknaah an lungawi thei lo.
Inrinni zan khan Real hian khualmualah Valencia chu 2-2 in an inhnehtawkpui a, hun pek belhah Bellingham hian chakna goal a khungah a inngai. English midfielder goal khung hi Brahim Diaz-a cross a tauh luh a ni a, boruaka ball a awm lai takin referee-in hun tawpna a ham.
Real-in chakna goal an khungah an inngaih laiin referee Jesús Gil Manzano erawhin hun tawpna a ham hman miau avangin Bellingham-a goal hi a pawmsak lo a, penalty box-a ball kan lai taka hun tawp hamrik a ham hi a mak angreng.
Referee thutlukna avangin Real Madrid an lungawi lo a, Bellingham a lungawi lo lehzual. English midfielder hian ṭawngkam mawi lo tak a hmang niin an sawi a, inkhelh zawhah referee chuan, "A nungchang a zahpuiawm a, goal a nih thu a sawi chamchi bawk," tiin Bellingham red card a pek chhan a report.
Real Madrid coach Carlo Ancelotti chuan, "Bellingham-a red card pek a ni kha kan lawm lo hle. Midang tihelna ṭawngkam engmah a hmang lo a, goal a nih ngei thu a sawi mai a ni. Chu chu kan zavaia kan ngaihdan pawh a ni a, referee khan a tisual a ni.
"A goal khung pawm a nih loh khan a thinrim hle tih chu kan hre vek a, mahse, kha chu thil awm tak pawh a ni. Mahse, midang tihelna erawh engmah a awm lo," a ti a, a player a chhan tlat.
Real hian Valencia lakah hnehna chang zo lo mah se league table chung ber an la luah chhunzawm tho a, match 27 khelh tawhah point 66 neiin, an hnuai chiaha awm Girona aiin point sarih ngawtin an la sang zawk.
Los Blancos hian Champions League lamah pawh beisei tur an la nei a, zanin dar 1:30-ah round of 16 khel turin RB Leipzig an mikhual ang - first leg-ah Real hian 1-0 in hnehna an lo chang tawh a, mahse, German club lakah hian vanneihna an mamawh.
Zaninah erawh mahni muala inlan tur an nih avangin Real-in nuamsa taka chak an inbeisei dawn. La Liga-ah hrem ni mah se Bellingham-a'n Champions League match a khel thei dawn a, hliam vanga chawl rei sa Eder Militao leh David Alaba tih loh chu Real hian hliam an neih belh lo bawk.
Goalkeeper chhuanvawr, hliam vanga rei tak chawl tawh Thibaut Courtois chuan training a zawm leh tawh hial zawk a, mahse, Andriy Lunin a chet ṭhat rih tho avangin Ancelotti-a'n Belgian keeper luhtir a hmanhmawh lo ang.
Hetihrual hian RB Leipzig pawhin inhliam tharlam sawi tur an nei lo a, an ṭhat dan berin Real an lenchilh dawn - Santiago Bernabeu-ah goal khung an mamawh avangin attacking football khelh a ṭul dawn a, a hmuhnawm loh ring suh.