Intuaihriam tum Nadal
Rafael Nadal chuan tun kara khelh tur Indian Wells chu intuaihriam nan hman a tum tih a sawi a, a inkhelh thiamna clay court season atana inbuatsaih nan a hmang dawn tihna a ni.
Nadal hi season hmasa Australian Open khelh lai khan a inhliam, kum khat deuh thaw a inkhel thei lo zui. Kumin January thla khan Brisbane International-ah a inlan a, Grand Slam hmasa ber khelh tum mah se a inhnukdawk.
Hliam vangin thla khat vel a chawl zui leh a, tun hnai khan exhibition match chu a khel leh thei tawh. Zanin zanlai hian Indian Wells a match hmasa berah Milos Raonic nen an inkhel dawn - Raonic pawh hi hliamin a tihbuai reng tawh a ni ve bawk.
Kum 37 mi Nadal chuan, "Ka tana pawimawh ber chu a ṭha thei ang bera Indian Wells khelh hmasak phawt mai hi a ni. Tunah hian ka hma hun hi engmah mai hi 100% a sawi chian theih ka nei lo, chuvangin engkim mai hi a ṭha thei ang bera hlen chhuah zel ka duh.
"Indian Wells hi ka mangṭha nghal tihna a ni bik lo, tun hnai kum hnih chhung chu ka duh leh beisei angin ka hmang thei lo zel a, chuvangin engmah hi lo sawi lawk ve theih a ni ṭhin lo," tiin a sawi.
Season hmasa French Open an khelh dawn khan Nadal hian season thar (tun season) hi a tan hun hnuhnung a nih tur thu a lo sawi tawh. Mahse, kuminah pawh a besei angin a inkhel thei leh ta rih chuang lo.
World number 1 hlui Nadal hian tun hmain Indian Wells nomawi hi vawi thum a chawi tawh, hard court inelna ni mah se a chet ṭhat tawh ṭhinna hmun a ni. Grand Slam dawta inelna ngaihhlut a nih avangin player ṭha an inlan tam dawn, champion chu thil awlsam a ni dawn lo.
May thla chawhnu lam leh June thlatir lamah French Open an khelh leh dawn, clay court inelna lian khelh hmain hmun hrang hrangah inelna a awm leh bawk ang, heng tournament-te hi Nadal tan chuan dam vervawra khelh a châkawm leh hle ang.
Spanish star hian Grand Slam nomawi 22 a lak zinga 14 tehmeuh chu clay court aṭanga a vuak chhuah a ni, tun season atan clay court a ngaipawimawh leh bik a nih pawhin a mak lo ang, a vanglai aṭanga a tihfo ṭhin tawh dan a ni.