Semifinal-ah Goa Vs Manipur

FIFA Santosh Trophy 2024-ah Goa-in semifinal lut turin March 4, Thawhṭanni zan khan Delhi 2-1 in an lehthal. Nimin tlai quarterfinal inkhel dangah Manipur-in Assam 4-0 in an sawp a, semifinal-ah Goa nen an inhmachhawn ang.

Nizan khan Mizoram leh Kerala-in quarterfinal hnuhnung ber an khel a, result kan hre hman lo. Coach Lalsangzuala Hmar hote hian hnehna an chang a nih chuan March 7, Ningani tlai dar 2:30-ah Services nen an inkhel ang.

Darkar chanve

Golden Jubilee Stadium, Yupia-ah Delhi-in inkhel bul an ṭan ṭha a, corner kick hmang ṭangkaiin minute riatnaah Sahil Kumar hmangin Goa lakah hma an hruai. Delhi hi inkhelah an chungnung a, hmahruai pawh hi an phu zawk.

Mahse, Goa an insiamrem a; corner kick bawk an hmang ṭangkai. Goa hian Jobern Cardozo hmangin minute 20-naah si phurh an sut a, Lloyd Cardoza-a'n minute 29-naah a khung leh bawk.

Goa goal khungna hi corner kick ve ve a ni a, Delhi-in marking an tihṭhat loh an tuar. Darkar chanve chhungin goal thum a lut a, goal dang a luh belh tawh lo.

Chutihrualin Delhi hian beiseina neiin an nawr let a, goal ban pet per ṭumte pawh nei mah se an nawr na tawk lo. Hun tawp lamah Goa-in ball an chang tam zawk thei a, inkhel thunun zawkin 2-1 in an chak.

Minute 20 lek

Manipur leh Assam inkhel chu minute 20 chhung lekin a zo a tih theih. Manipur-in bul an ṭan ṭha a, tun inelnaa khel ṭha chungchuang Phijam Sanathoi Meetei-a'n minute lina lekah goal ṭha zetin a khung.

Goal khung hnuah pawh Manipur-in an nawr chhunzawm a, Ngathem Meetei-a'n a chance neih hmasak hlah mah se minute 11-naah a cross ball chu Wangkheimayum Sadananda Singh-a'n a tauh goal.

Sanathoi thawhrah sengin Sadananda-a'n minute 16-naah goal hnihna a khung leh a, minute thum hnuah Sanathoi-a'n Manipur tan penalty a hlawh chhuak leh bawk. Ngangbam Pacha Singh rawn pen chhuakin chiang zetin a pet goal. Minute 20 chhungin semifinal lut tur a chiang der.