Inter Milan an sang zel

Serie A champion tur chu la puan theih chiah loh mah se a chiang thawkhat ta - Inter Milan chuan an mikhual Genoa 2-1 in an hneh a, point thum sual chhuakin an hmahruaina an sawhnghet.

Thawhṭanni zan Serie A inkhelah Inter Milan tan Kristjan Asllani-a'n goal hmahruai a khung a, chawlhlawk hmain Alexis Sanchez chuan Nicolo Barella-a penalty hlawh chhuah khung lehin Inter chu dinhmun ṭha takah a dah.

Inkhel chawhnu lamah Genoa tan Johan Vasquez chuan goal khat sut ṭhen ve mah se a dang a lut tawh lo. Inter hian league match an khelh hnuhnung pakuaah hnehna an chang vek, inelna hrang hrangah match 12 an chak zawn tling ta hial.

Kar tawp inkhel hmasa lamah Juventus chu Napoli lakah 2-1 in an lo tlawm tawh. Pahnihna ni lai Old Lady an tlawm laia an chak avangin Inter Milan hi table-ah point 15 teh meuhin an sang fal ta, mak tak maia an chesual viau a nih ngawt loh chuan an champion ang.

Hma hruai fal viau tawh mah se Simone Inzaghi a la ṭawng fimkhur hle. Inter Milan manager Inzaghi chuan, "Hmanni deuh kha chuan Red Bull team ang kan la ni phak lo, tunah chuan a danglam ta hret," tiin Formula 1 inelna thununtu Red Bull nen a inkhaikhin.

Italian manager chuan sawi zawmin, "Kan thil tum leh thlen tum chu kan kutah a awm. Juventus leh AC Milan te lakah point 15-in kan kal fal ta, hetianga thil a danglam thut chhung hi ni 33 chhung vel chauh a ni hial.

"Chuvangin hun rei lote chhungin thil a danglamin a inthlakthleng vek thei. Football team hi hun rei tak ka lo enkawl tawh, league match khelh hmabak a la tam avangin thil thleng thei a la tam hle a ni," tiin a la fimkhur hle.

Kum 47 mi Simone Inzaghi hian Serie A bikah match 300 a kaihruai tling ta chiah a, heng zinga match 178-ah hian hnehna an chang. Team dang a lo enkawl tawh ho zingah, league match hmasa 300 aṭanga tehin Inter hi a chakpui hnem ber.