March thla chhung chawl tur De Jong & Pedri

Barcelona-in season pawimawh vanglai takin thu lawmawm lo hriat tur an nei a, Athletic Bilbao laka inhliam Frenkie de Jong leh Pedri te chu tun thla chhung an inlan thei dawn lo.

Catalan club hian Pathianni zan khan La Liga inkhelah Bilbao chu 0-0 in an inhnehtawkpui a, he inkhelah hian hliam vangin De Jong leh Pedri hi lakchhuah an ngai. Dutch midfielder De Jong hian a ke rekah hliam neiin, Pedri hian a malpuiah hliam a nei thung.

Barcelona lam hian player pahnih chawlh chen tur hi he thu buatsaih a nih lai hian chiang taka puanzarna an la nei lo a, mahse, khawthlang media-te chuan April thla hma chu player pahnih hi an inlan tawh rih dawn lo niin an tarlang.

La Liga champion hian March thla chhungin match pawimawh tia sawi theih pahnih an nei a, March 12, Nilaini zan hian Champions League round of 16, second leg-ah Napoli an mikhual dawn a, first leg-ah 1-1 a an lo inhnehtawk tawh avangin he inkhel hi Barca tan a pawimawh hle.

Hei mai a ni lo - March 17, Thawhṭanni zanah league match khel turin Atletico Madrid chu khualmualah an lenchilh dawn bawk a, league nomawi humhim an tumna kawngah hmahruaitu Real Madrid chu point riatin an phak lo mek a, hei vang hian chetsual a thiang tawh lo. Chutiang boruak kara midfielder pawimawh pahnih an lo inhliam hi an tan a pawi hle.

De Jong hian tun season-ah ke rek hliam vangin thla hnih dawn khelmual pawnah hun a lo hmang tawh a, kum 21 mi Pedri pawh hi a inhliam zing ve ta malh malh hle. Barca tan 2020-21 season-ah khan khel ṭanin, a season hmasa berah hian match 52 a khel nghal.

Mahse, 2021-22 season-ah khan malpui hliam vangin ram leh club tan match 41 ngawt a khel thei lo a, 2022-23 season-ah khan a malpui hliam vang thoin match 15 a khel lo a, tun season ṭantir khan thla hnih leh a chanve khup hliam vangin a chawl a, kum tawp lamah khan tihrawl nain a tibuai leh bawk.

Barcelona hi an midfielder Gavi chu khup hliam vangin a chawl mek bawk a, coach Xavi chuan academy player Marc Casado leh Pau Prim te chu senior team-ah training turin a ko hial.

Catalan club hian tun dinhmunah Oriol Romeu, Sergi Roberto, Ilkay Gundogan leh Fermín López te chu central midfielder hliam an neih a ni a, centre-back Andreas Christensen chu tun hnaiah midfield-ah an chhawr ṭhin bawk!