Thutlukna siam sual Paul Tierney tel dawn lo

Liverpool leh Nottingham Forest an inkhelh ṭuma thutlukna siam sualtu, referee Paul Tierney chu kartawp Premier League inkhela referee tur zingah a tel dawn lo. Mahse, Inrinni zana Arsenal leh Brentford inkhelah erawh video assistant referee-in a awm dawn thung.

Kartawp inkhelah khan Liverpool hian 1-0 in Forest an hneh a, inkhela goal awmchhun hi hun pek belha Darwin Nunez-a khung a ni. Hun pek belhah hian Reds defender Ibrahima Konate-a hliam vangin Tierney hian inkhel a titawp lailawk a, hetihlai hian Forest lamin ball an chang.

International Football Association Board danah chuan, inkhel tihtawp lailawk a nihin, tihtawp a nih lai ball changtuten ball an channa aṭangin bul ṭan leh tur a ni. Mahse, referee Tierney hian Liverpool goalkeeper Caoimhin Kelleher hnenah ball pein, bul a ṭantir leh ta zawk.

Inkhel ṭan ṭhat leh aṭanga minute khat leh second 90 hnuah Liverpool-in goal an khung zui a, Forest player leh staff-te an lawm lo hle. Inkhelh zawhah referee an din hual a, lungawi lo fal coaching staff zinga mi Steven Reid chu red card pek a ni hial.

Forest neitupa Evangelos Marinakis a lungawi lo fal a, Greek sumdawng hausa hian match official-te chu referee office thlenga zuiin, a lungawi lohna a tilang hial a ni.

Premier League-a kum 13 zet referee lo ni tawh, tuna Forest referee analyst Mark Clattenburg chuan Tierney thutlukna siam dan hi a lo sawisel tawh a, Clattenburg chuan, "Tierney hi ka la be lo a, kha chu club tihturah ka dah. Inkhelh zawh khan referee dressing room-ah kal ka tum a, mahse, a phal lo a ni," tiin a sawi.