LPS Cup: Thenzawlin Dinthar an pet chhuak!

Zemabawk North pet chhuaktu Thenzawl Jt-in tualchhung football-a hming langsar ho an hre ve lo - nimin khan Mahindra XUV 300 LPS Cup Inter Village Football Tournament 2024 round of 16 inkhel hmasa berah Dinthar an hneh leh ta a, Thenzawl hian 5-2 in football thiam veng tia hriat ṭhin Dinthar an pet chhuak.

Rajiv Gandhi Stadium, Mualpuia inkhelah Thenzawl hian minute 42-naah Remsangpuia hmangin goal an khung ṭan a, minute 54-naah Hmingchungnunga'n a belhchhah. Dintharin Lalbiakzuala hmangin si phurh sut ṭhenin, beiseina nei thar mah se a thamral zui.

Thenzawl tan hian Malsawmtluanga Ralte leh Lalramthara ten an khung ve leh a, Remsangpuia'n hun pek belhah an goal ngana a khung bawk - Dinthar tana tawnhriat nei ṭha Samuel Laltlanthanga goal khung pawhin awmzia a nei phak lo.

Round of 16 match hnihnaah nizan dar 8:00 khan Chhinga Veng leh Bethlehem Vengthlang an intawng a, he thu buatsaih a nih lai hian an result kan hre hman lo - vawiin tlai dar 4:30-ah Salem Veng leh Kawnpui Jt. inhmachhawnin, zan dar 8:00-ah Bethlehem leh Ramhlun South an inkhel ang.

RG Stadium, Mualpuiah vek round of 16 hi khelh tur a ni a, LPS1-ah inkhel hi live-a pekchhuah ṭhin a ni.