Everton-in sum an hloh hnem

Premier League club insiamṭhat tum mek Everton chuan thla 13 liam ta chhung khan pound maktaduai 111.8 an hloh thu an puang a, Merseyside club sum hloh tam chhan hi player lakluh nana an insen hnem leh coach an thlak ngun vang a ni ber. 

Everton hian kum 2017 khan pound maktaduai 30.6 zet hlawkna an tel thei a, kum 2018-ah pound maktaduai 13.1 an hloh thung. Tuna an dinhmun hi an club chanchina sum an hloh hnem ber ṭum record a ni. Merseyside club-a share ngah ber Farhad Moshiri-a’n Everton hi club lian taka siam tumin hma a la nasa a, February 2016-a Everton-a share a lei hnuah player lei nan ringawt pound maktaduai 450 an seng tawh. 

Everton hian Bramley-Moore Dock-ah stadium thar sak an tum mek bawk a, an stadium sak tur atan hian pound maktaduai 500 chu ‘budget’ a ni. Arsenal-a share neitu Russian sumdawng hausa Alisher Usmanov chuan pound maktaduai 30 a thawh ve dawn a, tihchian erawh a la ni lo thung.

 

Premier League-a 11-na ni mek Everton hian coach Marco Silva an ban hnuah AC Milan, Real Madrid leh Chelsea boss Carlo Ancelotti an lalut a, zanin dar 8:30 hian Premier League-ah West Ham an lenchilh ang.