Zanin dar 11-ah Manchester Derby

Khawvel derby ngaihven hlawh ber zinga mi Manchester Derby chu zanin dar 11:00 hian Old Trafford-ah khelh a ni dawn. Manchester United hian Champions League group stage an paltlang lo a, Ole Gunnar Solskjaer-a hmalam hun hril theihna a nih avangin Manchester City nena an inkhel tur hi a hmuhnawm sawt ang.

Ole Gunnar Solskjaer-a'n United a enkawl hnua a chet ṭhat lai chu manager nghet a nih hma leh a dinhmun a derthawnin a ni. Tun hi Norwegian manager dinhmun derthawn lai a ni a, chak a ṭul avangin Manchester United hi dahhniam ngawt theih 

an ni lo.

RB Leipzig laka United an mualpho zawhah #OleOut tih chu social media-ah 'trending' a ni pha a, Solskjaer ban duhtu an pung hle. Amaherawhchu United squad hi season liam ta thlir chuan a chhah ṭha a, chet ṭhat ṭum chuan eng team pawh hneh theih an ni.

Squad a chhah ṭha

Goalkeeper aṭangin buaina a awm ṭan. David de Gea hi number 1 ni mah se derby-ah hian Dean Henderson a lut zawk a nih pawhin mak tih a hlawh lo ang. Tlarhnungah left back Luke Shaw a dam tawh a, Alex Telles nen an inkarah lut tur zawk hriat thiam a harsa. German club nen an pahnih hian a lut kawp a, a fuh tawk loh avangin defender panga an hman chhunzawm a rinawm loh.

Midfield-ah Fred chhawr theih a ni tawh dawn a, Brazilian midfielder hi West Ham lakah khan squad-ah a telh a ni lo. Hammers player an len ṭhat avangin Fred hi an chawlhtirah a ngaih theih a, Man City hmaah a inlan leh thei tawh ang.

Paul Pogba chungchang an sawi nasa a, French midfielder hi thlan ngei ngei tur a ni ta lo. Pogba, Donny Van de Beek, Nemanja Matic leh Scott McTominay te zing aṭangin pahnih thlan a ni thei a, pakhat chauhin bul an ṭan thei bawk. Thil chiang erawh Bruno Fernandes-a'n hmun pawimawh a chang dawn.

Tlarhmaah Edinson Cavani leh Anthony Martial te dinhmun a la chiang lo a, Marcus Rashford leh Mason Greenwood te an dam ṭhat avangin Man United tlarhma a bil lo tura ngaih a ni.

Manchester khaw club pahnihah United-in record nei ṭha mah se tun hnaiah erawh City an ṭha tawh zawk. Pep Guardiola hoten awlsam takin Champions League knockout stage an thleng a, Premier League-ah pawh an khel ṭha leh tawh hle.

Marseille nena an inkhelh ṭumin Sergio Aguero chu bench aṭangin a rawn lut a, Argentine forward hian goal a khung nghal. Goal khung khawl Aguero hi league khel tur pawhin a inpeih tawh tih a lang a, Pep Guardiola-a'n bul a ṭan loh tur thu sawi lawk mah se bench-a a awm ringawt hi ngaih ṭhatna tham a tling

Tottenham laka an chak loh hnuah Man City-in match nga an khel leh tawh a, chak loh an nei miah lo. Kevin de Bruyne a vul chho leh tawh a, Belgian midfielder hi team pahnih danglamna tur a ni thei ang.

Marseille laka inhliam vanga thlak Eric Garcia leh Ilkay Gundogan te dinhmun a chiang lo a, amaherawhchu player pahnih thlakna tur hi Guardiola-a'n a nei ṭha tawk. 

Old Trafford-ah khel tur ni mah se entu an awm dawn loh avangin Man City hi ball chang tam zawk an ni ang a, Solskjaer-a'n tihsual lai changin counter attack hmanga vanneih a tum dawn a ni.