Champhai tan Zarkawt an la sang hret

Mizoram Super League (MSL) season 9 khel turin Zarkawt BCA an tlang. MSL vawi li champion tawh BCA hian Thawhlehni zan khan Champhai District Basketball Association chu 97-87 in an hneh a, best of three series chu 2-0 a lain an tlang.

Zarkawt BCA hian semifinal game 1 chu 93-85 in an lo la tawh bawk, game 3 khelh thlen ngai loin an tlang nghal. Nizan khan Khatla TBL leh Bungkawn LB Associates ten semifinal game 2 an khel ve thung, result erawh kan hre hman lo.

R. Dengṭhuama Indoor Stadium, Mualpuia semifinal game 2 inkhelah Champhai lam an ṭang thei viau a, hmahruaitu nih lai pawh an nei a, an kaltluan lai chuan 11-0 a kal lai pawh an nei, beisei pawh an nei sang hman hle.

Malsawmzela chu Champhai tan a che ṭha takzet, point 18 a neih bakah rebound vawi 10 lain double double a nei - state pawn aṭanga chah luh Tevis Ryan Robinson Jr (19 points, 11 rebounds) pawh a khel ṭha pangngai viau.

Mahse, hun pawimawh leh boruak sangah Zarkawt BCA an hriam zawk tlat. Vawi li ngawt an champion tawhna a nih avangin boruak an ngam - Zonunsanga (22 points), Lalnunpuia Renthlei (19) leh Lalrina Renthlei (14) ten a hunah tak team an khai chhuak.

Chak lo mah se Champhai tan an thlen chin hi lawmna tur a ni ang. Season hmasa khan MSL khel ve mah se team hlauhawm an ni phak lo, tun season-ah erawh chuan semifinal an thleng phak a, team ṭha BCA lakah pawh zahpuiawm loh takin an khel chhuak thei.

BCA erawh an la danglam lo - season hmasa final-a an chak loh hnu lawk khan champion tuma an intuai thar tur thu a ri a, club enkawltu lamin an sawi ang ngeiin an insiamṭha, kuminah a vawi nga nan champion an tum mek.

Nizan inkhelah Khatla TBL an chak a nih chuan series an la dawn, an chak lo a nih erawh chuan Bungkawn LB nen game 3 an khel ang - a tlang zawk chuan final-ah Zarkawt BCA hi an hmachhawn dawn a ni.