BVT-in Chhinga Veng an ngam

Mahindra XUV3OO LPS Cup round of 16-ah Nilaini zan khan tualchhung football-a hming langsar Bethlehem Vengthlang leh Chhinga Veng an intawng a, 0-0 a an inhnehtawk hnuin penalty-ah BVT hi 3-1 in an chak.

RG Stadium, Mualpuia inkhelah, Chhinga Vengin penalty-ah dinhmun ṭha an luah hmasa a, player chhuanvawr Rochharzela'n a khung hnuah BVT tana Lalruatkima pet chu Chhinga Veng goalkeeper Hosea Hmangaihsangzuala Ralte chuan a dansak. Mahse, Chhinga Vengin a zawnin vawi thum an chhuih lut lo zui a, BVT-in vawi thum rawn khung zuiin, 3-1 in hnehna an chang a, quarterfinal an lut.

BVT hian minute 90 chhungin chak theihna hun nei mah se, Rammawia'n a chance neih vawi hnih a chhawr lo a, Lalmuankima'n uiawm takin a hlah bawk - Chhinga Veng tan Chhara leh Lalhriatpuia ten an chance neih an chhawr bik lo.

Nimin tlai inkhelah Salem Veng leh Kawnpui Jt. an intawng a, Kawnpuiin Robert Lallawmzuala hmangin goal hmahruai an khung a, Salem Vengin Lalnunzira hmangin chhanglet mah se, Kawnpuiin Lalkrossmawia leh Lalrintluanga hmangin an khung leh a, 3-1 in an chak - Rintluanga'n goal a khung hi minute 103-na a ni a, RG Stadium-ah inkhelh laklawh laia light a chhiat avangin minute hi a rei ta hret a ni.

Kawnpuiin 3-1 in Salem Veng an hneh a, quarterfinal an lut.