Ṭantu nei ṭha Mizoram an vannei

Santosh Trophy vawi 77-naah Mizoram chuan a zawna vawi thum an hneh tawh loh Kerala hnehin semifinal an lut. March 5, Thawhlehni zan inkhelah hian hun pangngaiah goal a lut lo a, penalty shootout-ah Mizoram 7-6 in an vannei. Mizoram hian semifinal-ah qualifying round-a an hneh loh Services an hmachhawn ang.

Golden Jubilee Stadium, Yupia-ah Mizoram team-in Itanagar Mizo Welfare Association aṭangin ṭawiawmna ṭha an dawng a, inkhel inhnehtawk takah a vannei zawkah an ṭang. Mizoram manager K. Lalenghluna (Maenga) chuan, "Kan theihna zawng zawng kan chhuah a, kan tih theih bakah Pathianin hna a thawk a ni. Ṭawngṭai hi kan chakna hnar a ni a, inchhuang thei kan ni lo," tiin Vanglaini a hrilh.

Dawngtea a damlo

Mizoramin pahnihna ni chungin group stage an paltlang a, match zawng zawnga inlan vek MS Dawngliana chu damlohna avangin a che chhuak thei lo. Kerala a hmachhawn thei lo mai ni loin inkhel en tur pawhin stadium a pan thei lo a, hotel-ah a hahdam.

Tlarhmaa player pawimawh MC Malsawmzuala chu khup hliam vangin zingkar 'walk-naah' pawh tel loin room-ah a awm hahdam a; Itanagar-a boruak inthlak vangin player zingah hritlang/khawsik tenau nei an awm bawk.

Kerala chu...

Kerala hi champion ngei tuma inbuatsaihna nei ṭha an ni a, residential camp neiin an player pawimawh Kerala Police player-te pawhin camp hi a tir aṭangin an zawm. Nikum qualifying round-ah Kerala hian Mizoram hi EMS Stadium, Kozhikode-ah 5-1 in an sawp a; hemi hma, tun ṭuma coach Lalsangzuala Hmar enkawl Mizoram team chu ṭum hnih an hneh tawh.

Tun ṭumah pawh hian Kerala hian na takin an nawr nghal a, minute hnihna lekah Muhammed Ashiq Shoukathali goal khung tur chu keeper F. Lalmuanawma'n ṭha zetin a dang. Kerala-in winger pahnih hmang ṭangkaiin na takin an nawr a, Mizoram an bet hle. Insiamṭha turin Mizoramin minute 20 vel an mamawh a, an insiamrem hnuah erawh an chungnung ta hret.

Inkhel nung ṭha

Mizoram wing back Ephraim Lalremtluanga cross chu Lalthankima'n a tauh a, keeper Mohammed Azhar-a'n a dang ṭha takzet. Team pahnih an fimkhur tawh a, ball vawrh a tam. First half tawp dawn hnaiah Naresh-a'n vei lam aṭanga la lutin goal-ah a pet pawp a, keeper Muanawma'n a dan hnuah crossbar a per.

Mizoramin Sawma Tlangte hmangin an vaw let ve nghal a, Lunglei tlangval ball pek chu Ainawn tlangval Thathana'n la lutin goalkeeper Azhar bum mah se a pet nghal loh avangin goal hmuh tur a awm ta lo!

First half-ah Mizoramin 57% ball possession an nei a, goal chance an neih dan erawh an intluk tawk thung. Second half-ah Kerala an rawn khel ṭha leh hret a, amaherawhchu Mizoramin captain R. Malsawmtluanga hmangin inkhel an thunun zawk.

Goal chance ṭha bik hmuh tur a awm meuh lo a, Mizoram an vanduai. Vanneih ṭum ni se Sawma Tlangte leh MC-a ten penalty hlawhchhuah theihna remchang ṭum hnih an nei a, referee-in a pe lo ve ve. Mizoram tlarhmaten a tawp an thleng zo lo a, minute 90 chhungin goal hmuh tur a awm lo. Hun tawp hmain captain MS-a chu inhliam vangin MPL10 best midfielder H. Lalbiakthanga'n a thlak.

Exra time-ah MS-a awm loh a lang a, Mizoramin inkhel thunun an harsat hret a, team pahnih an fimkhur avangin chance ṭha bik hmuh tur a awm lo. Mizoramin goal khungah an inngai a, ball-in HP-a kut a per avangin pawm a ni lo. Hun tawp lamah Malsawmfela luhtir a ni a, danglamna thlen turin hun a nei tlem hret. Chutihrualin Sawmfela hi penalty pet tura tiin a sawi theih a, captain Lalrinchhana Tochhawng pawh penalty pet tura luhtir a ni bawk.

Mizoram an lawm

Penalty hmangin chak zawk zawn a ni a, Mizoramin penalty atan inbuatsaihna nei ṭha mah se training leh a tak a inan tak tak theih loh avangin a vannei zawk zawkin semifinal an lut dawn. Mizoramin pet hmasak an thlang a; MC-a, Sawmfela, FC Lalhmunmawia, Ephraim, Rinchhana, HP-a leh BT-a ten an khung vek.

Kerala lama pet hmasa pali Sanju, Arjun, Mohamed Salim leh Riswanali ten an pet ṭha takzet a, keeper Muanawma tan dan ngaihna a awm hlawm lo. Panganaa pettu Sarath Prasanth ball pet erawh Muanawma'n khawih fuh mah se goal-ah a lut tho. Sudden death-ah Jithin-a'n Kerala tan khung mah se Sujith-a'n goal zawnah a pet lo a, Mizoram an vannei.

Mizoram coach Lalsangzuala Hmar chuan, "Kan inkhel en tur hian hmun hla tak tak aṭangtein Mizo hnahthlakte an lo kal khawm a, an chungah kan lawm takzet a ni. Kerala hi keimah ngei pawhin ṭum hnih ka lo hneh tawh lo a, tun hnaiah kan hneh loh bawk avangin tun ṭuma kan chak hi a hlu lehzual. Player-ten an theihna zawng zawng an hlan a, an chungah ka lawm a ni," tiin Vanglaini a hrilh a, Mizo mipuite ṭawngṭaina rah a nih thu a sawi tel bawk.