Bayern nomawi beiseina a la thi lo e!

Harry Kane-a'n champion duhin Bayern Munich a pan a, mahse, Bundesliga-a season 11 zet a zawna champion tawh hian hmahruaitu Bayer Leverkusen chu point 10-in an phak lo mek.

German Super Cup-ah an chak lo a, German Cup-ah beisei tur an nei tawh lo. Champions League round of 16 first leg-ah Lazio chu 1-0 in an ngam lo bawk a, champion duh Harry Kane hian 'NIL' bawkin season a mangṭha dawn niin a lang.

Mahse, Bayern beiseina a la thi vek lo a, Kane-a tan beidawn a la hun lo e! Nilaini zan khan Champions League last 16 second leg-ah 3-0 in Lazio an hneh a, quarterfinal an lut - Kane-a'n goal hnih khungin Thomas Muller chuan goal khat a khung bawk.

A hunah Kane

Serie A lama beisei phak bik lo Lazio-in Bayern lakah 1-0 a hmahruai sa chungin Allianz Arena an lenglut a, 2-0 a hmahruai theihna remchang pawh nei mah se Ciro Immobile chuan uiawm takin a tauh goal lo - Bayern ben harhin an awm a, goal an khung zui.

Minute 38-naah Kane chuan Leroy Sane-a shot aṭanga ball kal chu a tauh lut a, first half hun pek belhah Matthijs de Ligt-a volley aṭanga ball kal chu Muller chuan an goal hnihna ni turin a khung zui. Mahni muala inkhel an nih bawk avangin chak tur a chiang tawh tiin a sawi theih.

Mahse, Bayern hian an lo la duhtawk lo cheu. Minute 66-naah Kane chuan an goal thumna a khung a, Muller-a'n chance nei ve leh mah se, post a tihper thung - hun tawp thlengin goal dang a lut lo a, inkhel pahnih belhkhawmah 3-1 a chakin Bayern an tlang.

Fak a ngai

Hun harsaah Kane-a'n a team a chhanchhuak leh ta a, tun season-ah nomawi chawi lo pawh ni se, ram dang, league thara a tlangnel hmazia hi sawi nep theih a ni lo - Kane hian Bayern a pan hnuah match 33 khelin goal 33 a khung ta a, assist vawi riat a nei bawk.

English striker chuan, "Striker kan nih chuan, a bik takin tun ang match harsaah hian goal leh assist aṭanga teh kan ni ṭhin a, ka team ka pui thei hian mahni inrintawkna nasa tak min siamsak ang. Ka theihtawp ka chhuah zel dawn a, keima mimal tak chuan ka goal khung zat avangin season ṭha tak a ni a, mahse, team angin hei aia ṭha hian kan la ti thei," a ti.

Kane chuan, "Kan tan chuan zan duhawm tak a ni a, mahse, hmasawn zel kan ngai tih erawh kan hria. Zanin kan result ang hian season a thlak danglam thei a, ka ṭhiante ka chhuang hle. First leg result avangin mi zawng zawngin zanin kan khelh dan tur an thlir a, kan tiṭha hle. Kan season her rem nan kan hman theih ka beisei," a ti a, duhawm taka season khar theih a la beisei.