PSG mamawh chhanna Mbappe

Paris St-Germain boss Luis Enrique-a'n tun hnaiah, season tawp ruala chhuak tur Kylian Mbappe chu bench-ah a dah ṭhin a, bul a ṭan pawhin a la chhuak leh ṭhin. Spanish coach hian sawiselna tawk mah se, "A tel loa khelh kan zir a ṭul," a ti a, season thara Real Madrid pan tur striker tel loa khelh dan tur a ruahman lawk.

Mahse, game pawimawhah chuan PSG tan Mbappe mamawhna a la sang reng a, a tel loa khelh zir hi a har tawlh tawlh dawn - Nilaini zan khan Champions League round of 16 second leg-ah Mbappe hian goal hnih a khung a, PSG chu Real Sociedad lakah 2-1 in a chakpui.

PSG hi inkhel hmasa nena belhkhawmin, 4-1 in an chak a, Champions League quarterfinal an lut. Mbappe hian minute 15-naah goal hmahruai khungin, minute 56-naah a belhchhah leh a, Sociedad tana Mikel Merino goal khung chu mualpho zualpui khuhna chauh a ni.

Kum 25 mi Mbappe hian tun season Champions League-ah match riat khelin goal ruk a khung ta a, ani aia khung hnem an awm lo. Tun season inelna hrang hrangah match 34 khel tawhin goal 34 a khung a, assist vawi sarih a nei bawk.