Europa League: Liverpool inlan hun a thleng

European football-a club inelna sang ber dawttu Europa League round of 16 first leg chu zaninah khelh ṭan a ni dawn a, Premier League hmahruaitu Liverpool chuan zanin dar 11:15-ah Sparta Prague an lenchilh ang.

Player hliam vanga talbuai Liverpool hi tun hnaiah an inkhel zing mawlh mawlh hle - tun hnai ni 12 chhungin tun hi match li an khelhna tur a ni a, Jurgen Klopp-a tan player siksawi thiam a ṭul leh dawn.

Liverpool nena sawizawm hlawh reng Xabi Alonso pawhin zaninah Bayer Leverkusen chu round of 16 khel turin a kaihruai dawn a, zan dar 11:150ah vek Qarabag FK an lenchilh ang. Italian club langsar AC Milan chuan zan dar 1:30-ah Slavia Prague an mikhual dawn thung.

Premier League club zingah Brighton & Hove Albion chuan zanin dar 11:15-ah AS Roma an lenchilh ang a, West Ham chuan zan dar 1:30-ah SC Freiburg an hmachhawn dawn bawk.

Damdawi in lun

Liverpool-in hliam vangin player engemaw zat an chhawr thei lo mek a, inhliam langsar bera chhal ngam chu Mohamed Salah a ni a, Egyptian forward hi AFCON hnuah Reds jersey hain inlan leh tawh mah se, a inhliam leh a, a la chawl mek.

Salah hian training a zawm hnai nia sawi a ni a, zawm thei ta pawh ni se, Jurgen Klopp tan Egyptian forward hi khelhtir rih loh a fuh ber zawk ang. Ryan Gravenberch leh Curtis Jones te an dam hnai a, Sparta Prague hmachhawn nan erawh a la hma.

Goalkeeper Alisson a la chawl a, a awm loh laia Caoimhin Kelleher-a'n hna a thawh ṭhat thawkhat avangin Liverpool fans tan mangan lutukna tur erawh a ni lo.

Hetihlai hian Joel Matip, Trent Alexander-Arnold, Diogo Jota leh Thiago Alcantara te chu la chawl rei deuh tur an ni bawk a, rawlthar pahnih Stefan Bajcetic leh Ben Doak an la chawl mek bawk.

Engtin nge?

Reds hian League Cup nomawi an chawi tawh a, FA Cup quarterfinal an lut tawh a, Premier League-ah hma an hruai bawk - tun season-ah nomawi pali chawi vek an duh a, mahse, an beisei ang tihlawhtling tur chuan Klopp-a'n player a her rem thiam a ṭul dawn.

Liverpool-in tun hnaiah match an ngah avangin player an chau a, inhliam vangin squad a pan bawk si a, Klopp tan a lu hai thlak hle - tun Pathianni zan hian Manchester City chu Premier League-ah an hmachhawn zui dawn.

German coach tan Sparta lakah neih ṭhat ber ber thawhchhuahpui chi a la ni lo tihna a ni a, league match hnuhnung bera Nottingham Forest an hneh ṭumin Darwin Nunez, Dominik Szoboszlai leh Wataru Endo te bench aṭangin lut mah se, zaninah chuan chawlh hahdamtir a fuh ang.

Chuti a nih chuan Virgil van Dijk pawh chawlh hahdamna hun pek a niin a rinawm a, Ibrahima Konate hoin Jarell Quansah, Konstantinos Tsimikas leh Joe Gomez ten bul an ṭan a ngai ang a, tlarhmaah Cody Gakpo leh Luis Diaz mawhphurhna a sang dawn bawk.