Inelna hmachhawn turin Marquez a inpeih

Bike intlansiakna sang ber MotoGP chu tun kartawp aṭangin season thar an tlan ṭan dawn, rider ngaihven hlawh berte zinga mi Marc Marquez chuan inelna hmachhawn tura a inpeih thu a sawi.

Spanish rider Marquez hian hun rei tak chhung Repsol Honda bike a khalh a, hlawhtlinna hrang hrang pawh a chang hnem hle. Mahse, Honda nen hian inremsiam tawnnain contract an titawp, kuminah chuan Gresini Ducati tan a tlan dawn.

MotoGP champion vawi ruk ni tawh Marquez chuan, "Ruahmanna hrang hrang a kaltluang viau, sawi tawh ṭhin angin chona thar ka hmachhawn tur hian min tiphur hle a, inelna neih ka châk tawhin ka inpeih tawh hle.

"Mi ṭhenkhat chuan ka lakah beisei an nei sang ngam tawh lo tih pawh ka hria, tun hnai season thum chhung vel ka hman dan thlir chuan a mak hran lo. Season tharah erawh a bul aṭanga ṭha taka tihtheih ka inbeisei," a ti.

Hliam vangin Marquez hi a buai rei ta hle a, intlansiak a hmachhawn mumal thei ngai meuh lo. Kuminah chuan tun hma lama a theihna sang leh ropui tak ang kha lantir leh ngei a tum ruh hle.

MotoGP season tharah hian intlansiak 21 awm tura ruahman niin, a hmasa ber atan Pathianni zan hian Qatar Grand Prix an tlan ang. Indian GP chu September thla chawhnu lamah tlan tura ruahman a ni.