NorthEast United khelmualah Punjab

Thawhlehni zanah Indian Super League inkhel awm loin an chawl a, nizan aṭang khan khelh chhunzawm lehnghal a ni. Nizanah FC Goa chuan East Bengal an mikhual a, an result kan hre hman lo.

Zanin dar 7:30-ah NorthEast United chuan Punjab FC an mikhual dawn a, inkhel en châkawm a ni - Highlander hi table-ah pariatna ni mah se, parukna chinin playoff an khelh dawn avangin beisei tur an la nei a, I League champion Punjab tan pawh beisei a la bo lo!

ISL kalphungah table-a pakhatna leh pahnihna chu playoff semifinal khel turin an tling nghal a, pathumna aṭanga parukna te chu playoff knockout khel turin an tling thung - playoff knockout-a chakte chuan semifinal-ah table-a pakhatna leh pahnihna hi an hmachhawn ve leh dawn a ni.

Tun dinhmunah Bengaluru chu table-a parukna niin, 11-na Punajb hian point li chiahin an phak lo a, match khatin an khel tlem - hei vang hian playoff knockout khel phak turin chance a la awm a, boruak a la 'hot' dawn chauh.

NorthEast United hian point khatin parukna Bengaluru hi an phak lo mek a, match khatin an khel tlem thung.