Celtics hnehtu Cleveland Cavaliers

Point 22 ngawta an hniam zawk hnuah Cleveland Cavaliers an tho chhuak a, nimin zing NBA regular season inkhel hmuhnawm takah Cleveland hian Boston Celtics chu 105-104 in an hneh.

Celtics hi tun hnaiah an khel ṭha thei hle a, a zawna a vawi 12 nan chak ngei pawh an inring hman viau. Quarter hnuhnung ber an khelh dawn lai hian 93-71 ngawtin hma an hruai fal thei hial.

Mahse, quarter hnuhnung ber bikah Cleveland hi 34-17 ngawtin an chungnung, hun tawp hma second 19 chauh a awm tawh tihah Dean Wade chuan an chakna basket a lut a, ropui takin hnehna an chang.

Point 23 neitu Wade-a chuan, "Kan coach leh ka ṭhiante ka chungah rinna an nghat ngam a, min rin ang ngeia ka tihlawhtling thei kha ka lawm," a ti, quarter hnuhnung ber bikah hian point 20 tehmeuh a nei a ni.

Chak lo mah se Boston hi Eastern Conference hmahruaitu an la ni tho, season kal laiah vawi 13 an tlawmna chauh niin ṭum 48 ngawt hnehna an chang tawh thung.

Celtics coach Joe Mazzulla chuan, "Chak turah kan inngai a, ṭhenkhat laiah kha chuan point neih belh theih reng turah kan shot tam tawk lo deuh. Chutihrualin Cleveland khan chak phu khawpin an khel, a bik takin Wade khan fak a phu takzet," a ti.

Inkhel dangah Phoenix Suns chuan over time an khelh hnuin Denver Nuggets chu 117-107 in an hneh a, hnehna an chan theih nan point 35 neitu Kevin Durant leh Grayson Allen (28) ten an thawhhlawk hle.