Halep hremna an tinep

Damdawi hman phal loh a hman vanga an hrem Simona Halep chu hrem a nihna an tihtawisak a, kum li chhung atan hrem ni tawh chu Court of Arbitration for Sport (CAS) chuan thla kua atan a pawt tawi.

Kum 32 mi Halep hian dan kalhin vawi hnih thil a tisual nia sawi a ni a, hei vang hian kum 2026 October thla thleng atan hrem a ni, hrem a nihna pangngai hi kaltlangpui ni se la chuan a tennis zinkawng a tawp zui nghal ang.

Mahse, infiamna lama thubuai ngaihtuahtu sang ber CAS hnenah a zualko a, tunah chuan hun rei lote hnuah a infiamna ngainat ber tennis a khel chhunzawm leh thei dawn tihna a ni, tun season chhungin a hmel kan hmu leh hman dawn.

French Open 2018 leh Wimbledon 2019 champion Halep chuan, "Hun harsa ka tawh lai pawh khan beiseina ka nei reng a, ka duh leh sual vanga thil tisual ka ni lo a, a pawi tur tih hriat loh thil taksaa lut palh hi a awm ve thei, hei chu infiamna lam kalh a ni tih ka hre lo.

"Kei chauh ni loin mi dang pawhin hetiang harsatna hi an lo tawk tawh ṭhin. Tunah chuan hremna rei lo zawk ka chungah a tla ta, tennis khelh leh theih hlan ka nghakhlel takzet a ni," a ti.

Tennis player endiktu International Tennis Integrity Agency (ITIA) lam pawhin, thuneitu sang CAS thutlukna chu an zah thu an sawi ve bawk.