East Bengal-in point an hlawh hram

Indian Super League-a an match hmasa pathuma an tlawm vek hnuin East Bengal-in point an hlawh chhuak ve ta a, hun tam zawk player 10-a khel chungin Jamshedpur FC nen 0-0 in an inhnehtawk. 

Ni 650 hnua a vawi khat nan Jeje Lalpekhlua chuan ISL-ah bul a ṭan a, mahse Mizo Sniper hi a khelh dan enin 100% a la ni lo niin a lang. 

Kolkata club tan Khasi midfielder ṭha Eugeneson Lyngdoh chuan inkhel bul ṭan mah se minute 25-naah a yellow card pahnihna avangin hnawhchhuah a ngai a, player 10 an nih zui avangin khelh dan thlak a ngai a, Jeje chu minute 46-naah lakchhuah a ni. 

Jamshedpur tan Lal-dinliana Renthlei, Ricky Lallawmawma leh William Lalnunfela ten bul an ṭan vek a, bench aṭangin Isaac Vanmalsawma chu luhtir a ni bawk. 

Chhinga Veng defender hlui Dinliana hi a yellow card pahnihna avangin hun pek belhah hnawhchhuah a ni a, a yellow card hmasa zawk erawh a holam hret niin a lang. 

Dinliana hian Nerijus Valskis tan chance duhawm a siamsak a, mahse Lithuania international hian a hun ṭha neih goal-ah a chantir thei lo. 

Minute 46-naa luhtir Isaac-a'n minute 70-naah chance duhawm a nei a, mahse Hnahthial tlangval hian goal post sirah hret a hun ṭha neih hi a shot - a uiawm takzet. 

Kolasib tlangval William-a'n a tih tur tak a ti ṭhin a, ISL-ah a zawna a vawi hnih nan bul ṭanin Owen Coyle-a rinna a ti hlawhchham lo. 

Minute rukna lekah William hian Jamshedpur tlangval Mobashir Rahman tan ball ṭha tak a pe a, Rahman hian Aniket Jadhav-a pe zui - mahse kum 20 mi striker hian free tak chungin bar chungah a pet. 

Second half ṭantirah William bawkin Mobashir tan a siamsak a, mahse hei pawh goal-ah a lut chuang lo. East Bengal chu vannei zawk an ni a, JFC tan hian Stephen Eze leh Alex Lima-ten bar an tih per ve ve.