A tawp thlenga beitu Mizoram zinkawng a tawp

77th National Football Championship for Santosh Trophy-ah Mizoram chuan semifinal-ah Services 2-1 in an hneh lo a, kum 2014 hnua nomawi chawi an beiseina a tawp. Chutihrualin Mizoramin a tawp thlengin theihtawp an chhuah a, kum nga hnua final round an khelh lehna hmasa berah semifinal an thlen avangin kumin kum tawpa Uttarakhand-a neih tur National Games khel turin an tling.

Golden Jubilee Stadium, Yupia-a inkhelah Services tan Rahul Ramakrishnan leh Bikash Thapa ten an khung a, Mizoramin injury time-ah Malsawmfela hmangin si phurh sut ṭhen mah se goal dang hmuh tur a awm tawh lo. Nizan khan semifinal hnuhnung zawkah Manipur leh Goa an inkhel a, result kan hre hman lo. Final hi March 9, Inrinni zanah khelh a ni ang.

Player 11 chu

MPL10 best goalkeeper F. Lalmuanawma'n bul a rawn ṭan leh a, defence laiah captain Lalrinchhana Tochhawng aiah FC Lalhmunmawia thlan chhunzawm a ni a, FC-a hi MPL10 best defender Lalhmunmawia nen an inkawp.

Wing back-ah MPL9-a Chawnpui FC champion puitu pahnih Lalruatdika (Teka) leh Ephraim Lalremtluanga te an awm. Tlarhnung pui turin MPL10 best player H. Lalbiakthanga aiah Lalengmawia a lut.

Kawnpui tlangval Engmawia hi captain R. Malsawmtluanga nen an inkawp a, tlarhmaah MC Malsawmzuala leh MS Dawngliana te an inkawp. Dawngtea hi damloh vanga Kerala a hmachhawn lo tih loh chu a la khel kim vek.

Mual sirah tun ṭum Santosh Trophy-a hming chher Lalthankima (Thathana) leh Malsawmzuala Tlangte te an awm. Thathana hi Aizawl FC Academy chhuak a ni a, Sawma Tlangte hi SYS Football Academy-a awm tawh niin FC Venghnuaiah hming a chher tawh.

Services an chungnung

Semifinal inkhel boruak sangah Services-in bul an ṭan ṭha zawk a, Kerala nen minute 120 khelh zawha ni khat chiah awl Mizoram inkhel a nung lo. Services-in corner kick aṭangin goal chance hlauhawm an nei a, Shafeel-a'n vengtu a nei lo chungin goal zawnah a tauh thei lo.

Mizoramin Services tlarhnung an su nghing zo lo a, Services zawk zelin goal chance ṭha an nei. Samir Murmu-a'n counter attack aṭanga a hun ṭha neih chu goal zawnah a pet thei lo.

Minute 21-naah Services midfielder Rahul-a'n vei lam aṭanga ball cross chu box chhungah la thlain awlsam zeta petna tur a insiam hnuah goal hmahruai a khung. Mizoram captain MS-a'n freekick ṭha zetin pet mah se goal pawnah chiah a kal a, first half-ah inkhela chungnung zawk Services-in 1-0 in hma an hruai.

Mizoram ṭha zawk

Mizoramin midfield-ah an hneh loh avangin mual laiah HP Lalremruata an luhtir a, Lunglei tlangval hian si phurh sutna goal a khung teuh nghal hle. Second half-ah Mizoramin si phurh sut ngei tumin an nawr a, risk an la.

Sawmfela, BT-a leh Vanlalbiaa Chhangte te luh hnuah an nawr na lehzual a, Services-in goal venhim hna an thawk ṭan. Mahse, Mizoram keeper F. Lalmuanawma'n ball a chan rei hret avangin Services striker tlan chak Bikash Thapa-a'n a chhuhsak hman a, Bikash-a'n goal ruakah a khung. Mizoram vanneih ṭum ni se 'foul' ham theih a ni.

Mizoram an tlawm lo a, inkhel boruak a la ṭang at. Services defender Zothanpuia (Thangpuia) leh Mizo striker Sawmfela an indinchilh a, Thangpuia'n insum zo loa kut a thawh avangin hnawhchhuah a ni. Services-in goal hnih nei tawh mah se an talbuai a, Sawmfela rilru erawh a fim tulh tulh.

Sawmfela hian a chance ṭha neih hmasak goal zawnah pet lo mah se box pawna a freekick hlawhchhuah chu mawi zetin injury time minute thumnaah a khung. Jersey no. 77 hian hun tawp hma hretin box chhunga ball kang chu Services keeper man hmain a tauh a, goal line aṭangin Shafeel-a'n a pet chhuak.

Mizoramin goal khung se, extra time-ah player tam zawka khel tur an nih dawn avangin an dinhmun a ṭha dawn. Mahse, Mizoram vanneih ṭum a ni lo a, hun tawp thlenga huaisen taka an beihna chuan final a hruai thleng lo.

Mizoram manager K. Lalenghluna (Maenga) chuan, "Team angin kan chak a, team angin kan chak lo tur a ni. Mizoram tan mahni nupui fanau leh a ṭul ang kan kal san a, hun rei tak kan inpuahchah. Kan tum ram kan thlen loh avangin kan rilru a na tlang a, mah se hei hi football-in a ken tel a ni. Mizoramin nomawi chawi hun a la nei ang," tiin Vanglaini a hrilh.

Mizoram hian kum 2014-a Santosh Trophy nomawi an chawi hnuah semifinal vawi li an luh lehna a ni a, final an thleng zo lo vek.