Man City an chak nuamsa
Manchester City chuan Liverpool hmachhawn turin inbuatsaihna an nei ṭha hle. Nilaini zan Champions League last 16 second leg inkhelah Man City hian FC Copenhagen chu 3-1 in an hneh.
Pep Guardiola naute hian Manuel Akanji, Julian Alvarez leh Erling Haaland te hmangin goal an khung, mikhual tana Mohamed Elyounoussi goal khungin awmzia a nei tawh lo - inkhel pahnih belhkhawmah Citizens hi 6-2 in an chak.
Indah ṭha
An intawn hmasakah Manchester City hi 3-1 in an lo chak tawh. Tun kartawp hian Guardiola naute hian Premier League khel turin Liverpool khelmual Anfield an tlawh dawn, player neih ṭhat zawng zawng chhawr hun a ni lo.
Pep-a'n a player hman thiam Kevin De Bruyne, Phil Foden, John Stones, Bernardo Silva, Nathan Ake leh Kyle Walker te chu inkhel bul ṭantu zingah a dah tel lo vek a, league match lam a ngaipawimawh tel tih a chiang.
Anfield a ni bawk a - Man City tan buaina tur a awm chuang lo. Alvarez-a corner pet chu Akanji-a'n chiang zet maiin a lo pet lut nghal. Alvarez-a corner bawk chu Rodri-a'n bar a tauh per, ball per let hi Argentina international hian an goal hnih nan a khung zui.
Copenhagen lamin mawi taka Man City tlarhnung ṭhiat chungin goal nei ve bawk mah se, chawlhlawk hma thoin striker ṭha Haaland chuan amah vengtu pahnihte pawhin an dan theih lohin an goal thumna a khung, chak tur zawk a chiang fel nghal.
Manchester City hian tun hnaiah a zawna season sarih nan Champions League quarterfinal an lut ta, an nomawi kawl lai humhim turin kawng dik an zawh zel - season hmasa ang bawkin nomawi lian pathum chawi thei dinhmunah an la ding.
Hmabak Reds
Pep Guardiola-a'n tun hnaiah match hautak an khel hnem tih a chiang a, fimkhur takin a naute a siksawi ṭhin. Jacob Wright-a'n hun tawp dawn lamah Haaland a rawn thlak a, player ṭha pali chu khel tluan loa thlak an ni.
Manchester United an hmachhawn ṭuma inkhel bul ṭantu, player palite chu UCL-ah inlan leh mah se hun tawp hmain a la chhuak vek! A tam zawk chu bench lamah a hahchawlhtir zawk hial.
Guardiola chuan, "Kan hmaah eng nge lo thleng dawn kan la hre lo, chuvangin fimkhur takin engkim kan kalpui a ngai. Ka naute hian an hmabaka thil awm hi an ti thei a ni tih an hriat a ngai, chumi tur chuan kan infuih bawk.
"Kan elpuite hi Real Madrid leh Bayern Munich te an ni, chuvangin hmabak hi a awlsam lo. Real Madrid pawh harsa takin an chak hram tih ka hria, chuvangin Champions League hi chu a boruak a danglam hle," a ti.
UCL aṭangin Premier League an ngaihtuah leh rih a ngai dawn. Pathianni zan hian Anfield-ah hnehna an chang thei a nih chuan Reds khumin league hmahruaitu an ni dawn, an inhnehtawk a nih erawh chuan Arsenal chu a chung bera awm thei dinhmunah an ding ve bawk.