Bungkawn hnehin Khatla TBL an tlang

Khatla TBL chuan an tum lawk ang ngeiin Bungkawn LB Associates lakah a zawnin hnehna an chang. Mizoram Super League semifinal game 2-ah 95-83 a hnehin changin, best of three series chu 2-0 a lain final an lut.

Tualchhung basketball inelna sang berah hian champion lai Khatla TBL hian Zarkawt BCA an hmachhawn leh dawn, team ṭha pahnih bawkin nomawi an inchuh leh dawn tihna a ni - a hmuhnawm leh khawp ang.

Khatla TBL coach H. Lalhruaitluanga chuan semifinal game 2 an khelh hma khan, "Game 3 khelh ngai loa tlang nghal kan tum," tiin Vanglaini a hrilh a, coach tawnhriat nei ṭha hian a sawi lawk ang ngeiin Nilaini zan khan a naute a chak tlangpui a ni.

R. Dengṭhuama Indoor Stadium, Mualpuia inkhelah Champion lai TBL hian nikuma an champion pui Joshua Aaron Keys an hmang thiam chhunzawm - ani hi point 32 a neih bakah rebound vawi riat lain an chak theih nan a thawhhlawk hle a, final an thlen theih chhan langsar tak a ni.

League round lama an intawn ṭum khan Bungkawn hi an chak, khami ṭum khan TBL player ṭha Vanlalṭhazuala a inhliam. Ṭhazuala hi semifinal game pahnihah a inlan lo, coach Hruaia'n mamawh chuan chhawr theih a nih thu sawi mah se a chhawr leh rih lo.

Ṭhazuala awm lo mah se Lalliansanga'n point 17 ngawt a nei thei a, point 15 neitu Emmanuel VL Awmpuia a che ṭha bawk. Eddie Zaithanmawia (11 points), Moses Lalmuanzova (9) leh Michael Liansanga (9) ten an thlawp ṭha bawk.

League round hmang ṭha tak Bungkawn LB hi hun pawimawh laiah an che thei tlat lo. Gregory Lee Heckstall-a'n point 46 tehmeuh a nei thei, mahse mimala point neih tam viau hi MSL final luh nan a tawk zo tlat lo.

Tualchhung player zingah Lee Heckstall-a thlawp ṭha thei an awm lo a, point 10 nei tling an awm lo. MSL inelna sanga che ṭha tur chuan player chah luh fuh a ngaih bakah tualchhung player neih ṭhat a ngai tih chu a takin a lang.