Vanneihnain Real lam a ṭang - quarterfinal an lut
Santiago Bernabeu-ah Real Madrid-in beisei phak lo mah se, world class player-te vawi khat an chet fuh zeuh chu an tan a tawk a, Champions League quarterfinal an lut.
Real hian Nilaini zan khan Champions League round of 16 second leg-ah RB Leipzig an mikhual a, 1-1 in an inhnehtawk - Carlo Ancelotti naute hian inkhel hmasaah 1-0 in hnehna an lo chang tawh a, inkhel pahnih belhkhawmah 2-1 a chakin a thiam pariat zingah an tel.
Madrid khaw club tan Vinícius Júnior chuan minute 65-naah inkhela goal awmchhun a khung a, Leipzig tan Willi Orban chuan goal khatin chhanglet ve mah se, awmzia a nei phak lo. A tawpah Real an tlang - he inkhelah hian captain Nacho Fernández chuan Real tana a match 350-na a khel ve chiah.
Beisei phak lo
First leg-ah Real-in 1-0 in hnehna an chang a, mahse, Leipzig khelmuala an khelh danah inchhuanna tur a awm lo - an vannei tih chu inkhel khaikhawm dan awlsam ber a ni a, Santiago Bernabeu-ah chuan mize dang daih chhuah tumin an inpuahchah.
Inkhelh hmain coach Ancelotti chuan, "Kan ṭhat dan bera kan khelhchhuah a ṭul dawn. Goal khatin kan chungnung a ni mai a, inkhel a la tawp lo," a ti a, a naute chu an ṭha thei ang bera khel chhuak tura a beisei thu a sawi.
Mahse, Italian coach beisei angin Real an khel lo a, Leipzig player-te an huaisen a, chak an mamawh tih hriain Real hi na takin an nawr ngam. Spanish club vanneihna erawh Leipzig player zingah 'class sang' tia sawi vul chuk tur an awm lo a, goal hmaah an hriam tawk lo leh ṭhin.
A hunah tak
Real danglamna erawh Champions League boruak an ngam a, player an nei ṭha bawk - Toni Kroos-a shot ṭha zet chu Leipzig keeper Péter Gulácsi-a'n mawi lutuka a dan hnuah Real-in chance an nei leh a, Hungarian keeper hian a dang nawn tawh lo.
Kroos-a ball pek chu Bellingham-a'n ṭha taka a tlan luhpui hnuah, ball pek remchang turin Vincius chu mual vei lam aṭangin a laiah a tlan lut a, Bellingham-a ball pek chu la nghalin mawi zetin goal-ah a chantir.
He goal luh theihna tura Real che vel chu hmuhnawm a tling a, an khelh ṭhat loh ṭum pawha team ṭha danglamna an pholang - vawi khat tihfuhah goal an khung thei bik tlat zel!
A thlawn mai maw
Leipzig-in goal an chhuah hnuah na takin an nawr chhunzawm a, Xavi Simons-a shot ṭhe zet chu Antonio Rüdiger-a'n a lo dansak hman a, minute 68-naa captain Orban-a khung erawh keeper Andriy Lunin tan pawh dan rual a ni lo.
German fullback David Raum-a cross chu Orban hian ṭha lutukin a tauh lut. Leipzig an phur sawt a, mahse, first leg ang thoa goal khung an harsat avangin round of 16-ah an tlak a ṭul. Vawi 14 champion tawh Real laka an khelh dan an thlirkir apiangin an ui a zual ang.
Leipzig tan hian hun pek belhah Dani Olmo chuan chance duhawm lutuk a nei a, mahse, Barcelona aṭanga inzir chhuak midfielder hian post a tauh per - Belgium striker Lois Openda pawh goal hmaah hriam hret se chu, result kha danglam thei a ni.