Second round-ah Murray a lut

Andy Murray chuan straight set hmanga David Goffin hnehin Indian Wells khelh laiah second round a lut a, a match lehpekah chuan seeded pangana Andrey Rublev nen an inkhel leh dawn a ni.

Nimin zing first round inkhelah Murray hian Belgian tlangval Goffin hi 6-3, 6-2 in a hneh a, ama service a hum vek bakah a khingpui service vawi thum a chhuhsak thei, a khel ṭha pangngai hle.

Grand Slam vawi thum champion tawh Murray chuan, "Tun hnai tournament ka khelh hoah chuan ka service ṭhat ber ṭum a ni. Hetiang taka ṭha hian kum tam tak chhung ka service tawh lo," tiin a sawi.

Indian Wells-ah hian champion lai chu Carlos Alcaraz a ni a, Spanish star hian zanin zanlaiah a match hmasa ber a khel dawn a, seeded ni phak lo Matteo Arnaldi nen an inhmachhawn ang.

Thla hmasa khan Alcaraz hi Rio Open-ah a inlan a, mahse a kerek hliam vangin a inhnukdawk - tunah chuan dam tawhin inelna a hmachhawn thei dawn, season bul a ṭan fuh tawk lohna chu siamṭhat a thum dawn a ni.

Grand Slam vawi hnih champion tawh Alcaraz chuan, "Eng angin nge inelna ka hmachhawn theih dawn chu ka la sawi lawk thei lo, ka sawi lawk theih erawh chu ka nomawi humhim ngei ka tum dawn," tiin champion leh a tum ruh hle.