Nadal a inhnukdawk

Indian Wells khelh ngei tumin theihtawp chhuah mah se Rafael Nadal chu a inkhel thei leh ta rih lo a, hun tepter tawh takah tournament aṭanga a inhnuhdawh thu a sawi.

Spanish tlangval hi inlan thei ni se la chuan Milos Raonic nena inkhel tur an ni, a inlan theih loh takah chuan a hmun ruakah hian Indian tlangval Sumit Nagal a inlan theih phah thung.

Grand Slam vawi 22 champion tawh Nadal chuan, "Ka tournament ngainat leh nuam tih tak mai Indian Wells aṭanga ka inhnuhdawh a ngai ta mai hi hrehawm ka ti hle. Mi zawng zawng hian he hmun ka ngainatzia leh nuam ka tih dan chu an hria, chuvanga he hmun pan pawh ka ni.

"Tournament khelh ngei tum hian theihtawpin ka inbuatsaih a, training pawh ka nei ngawrh hle. Kar tawp khan ka taksa dinhmun pawh endik a ni, mahse tun hnaiah 100% ka ni thei tlat lo, thutlukna siam harsa tak ni mah se ka inhnuhdawh a ngai," a ti.

Nadal hian kar hmasa khan Indian Wells hi clay court season inbuatsaih nan a hman tur thu a sawi a, a thleng sang kher lo a nih pawhin match pangngai khelh hrim hrim a tum thu a sawi, tunah erawh a tum angin a awm thei leh ta rih lo.

Indian Wells-ah hian Nadal-a'n match 59 hnehna a chang tawh a, nomawi vawi thum chawi tawhin sulhnu a nei ṭha hle. Tunah chuan a inkhelh thiamna clay court lam a nghah leh rih a ngai dawn ta zawk.