A vawi khat nan Isaka an ko

India coach Igor Stimac chuan March international break-a ram tana inlan turin player 35 a ko chhin a, probable squad-ah hian a vawi khat nan Odisha forward Isak Vanlalruatfela chu koh tel a ni.

Isaka bakah hian India tana hmun pawimawh chang phak, Mumbai City forward Lallianzuala Chhangte leh Lalengmawia Ralte chu squad-ah koh tel an ni a, East Bengal defender Lalchungnunga a tel bawk - anni pathum hi chu final squad-ah pawh tel chiang ngei tura beisei an ni a, Odisha midfielder K. Lalṭhathanga (Puitea) chu koh tel a ni bawk.

Puitea hi Isaka ang thoin India squad-ah a la tel ngai lo a, mahse, Bethlehem Vengthlang midfielder hi probable squad-ah erawh a lo awm tawh - Blue Tigers tana jersey hak phak ngei a duh ang.

ISL table chung ber luahtu Odisha-ah Isaka leh Puitea hi player pawimawh an ni phak ve ve. Thingsulthliah/Bawngkawn tlangval Isaka hian Odisha tan tun season inelna hrang hrangah match 29 khelin goal nga a khung a, assist vawi li a nei - ISL match 18 an khelhah a inlan vek!

Puitea hian match 27 khel tawhin goal thum a khung a, assist vawi khat a nei ve bawk. Spanish coach Sergio Lobera hnuaiah player pahnih an vul a, India tana inlan phak ngei an tum ang.

FIFA World Cup 2026 qualifier second round-ah India hi tun thla tawp lam hian an inlan dawn a, March 21 zanah Afghanistan chu khualmualah an lenchilh dawn a, March 26 zanah an mikhual ve leh ang.

Blue Tigers hi group A-ah awmin, Qatar, Kuwait leh Afghanistan te nen an awm ho a, match hnih khel tawhin, Kuwait chu 3-0 in an sawp a, Qatar lakah 3-0 in an tlawm thung -table-ah pathumna an ni mek.

Second round-ah hian team 36 awmin, group pakuaah, team pali zel awmin ṭhen hran an ni a, group tina a sang pahnihte chu World Cup qualifying third round bakah Asian Cup 2027 khel turin an tling ang. Third round-ah hian group pathumah, team paruk zel awmin ṭhen hran an ni leh ang a, group pathuma a sang pahnih ṭheuhte chu World Cup khel turin an tling dawn a ni.

Pahnihna ni phak lote tan pawh chance a la awm dawn cheu a, group tina pathumna leh palinate chuan fourth round khel lehin, team pathum zel awmin, group pahnihah ṭhen an ni ang a, a sang ber ve ve chu World Cup khel turin an tling ang.

Group-a pahnihnate chu fifth round-ah double leg-in an inkhel leh ang a, a chak zawk chuan inter confederation playoff kaltlangin chance an la nei leh dawn a ni.

India probable squad:

Goalkeepers: Gurpreet Singh Sandhu (Bengaluru FC), Amrinder Singh (Odisha FC), Phurba Tempa Lachenpa (Mumbai City), Vishal Kaith (Mohun Bagan).

Defenders: Akash Mishra (Mumbai City), Lalchungnunga (East Bengal), Mehtab Singh (Mumbai City), Pritam Kotal ( Kerala Blasters), Rahul Bheke (Mumbai City), Nikhil Poojary (Hyderabad FC), Subhasish Bose (Mohun Bagan), Narender Gahlot (Odisha FC), Anwar Ali (Mohun Bagan), Roshan Singh Naorem (Bengaluru), Amey Ganesh Ranawade (Odisha FC), Jay Gupta (FC Goa).

Midfielders: Anirudh Thapa (Mohun Bagan), Brandon Fernandes (FC Goa), Liston Colaco (Mohun Bagan), Mahesh Singh (East Bengal), Sahal Abdul Samad (Mohun Bagan), Suresh Singh (Bengaluru), Jeakson Singh (Kerala Blasters), Deepak Tangri (Mohun Bagan), Lalthathanga Khawlhring (Odisha FC), Lalengmawia Ralte (Mumbai City), Imran Khan (Jamshedpur FC).

Forwards: Sunil Chhetri (Bengaluru), Ishan Pandita (Kerala Blasters), Lallianzuala Chhangte (Mumbai City), Manvir Singh (Mohun Bagan), Vikram Partap Singh (Mumbai City), Rahul KP (Kerala Blasters), Nandhakumar Sekar (East Bengal), Isak Vanlalruatfela (Odisha FC)