Match hnih atan Bellingham an hrem

Real Madrid midfielder Jude Bellingham chu Valencia nen an inkhelh ṭuma a red card avangin match hnih chhung inlan thei lo tura hrem a ni a, Spanish Football Federation (RFEF) chuan Bellingham hian, "Referee hmaah nungchang mawi lo tak a lantir a ni," tiin an hrem.

Kar hmasa Inrinni zan khan Real hi 2-2 in Valencia nen an inhnehtawk a, hun pek belhah Bellingham chuan Brahim Diaz-a cross aṭanga ball kal chu a tauh lut - English midfielder-in chakna goal a khungah a inngai a, referee Jesús Gil Manzano erawhin boruaka ball a awm laiin hun tawp ham rik a ham hman!

Referee thutlukna avangin Real Madrid an lungawi lo a, Bellingham a lungawi lo lehzual. English midfielder hian ṭawngkam mawi lo tak a hmang niin an sawi a, inkhelh zawhah referee chuan, "A nungchang a zahpuiawm a, goal a nih thu a sawi chamchi bawk," tiin Bellingham red card a pek chhan a report.

Real hian an player red card hi ngaihtuah nawn turin thlen mah se, RFEF disciplinary committee chuan Real ṭan chhan chu thu tlingah a ngai lo a, match hnih atan Bellingham hi hrem a ni ta zawk.

Tun season match 31 a khelh aṭanga goal 20 leh assist vawi kua nei tawh Bellingham hian, March 10, Pathianni Zanah Celta Vigo an lenchilh ang a, March 16, Inrinni zanah Osasuna an lenchilh leh bawk ang - heng inkhel pahnihah hian Bellingham a inlan thei dawn lo tihna a ni.