Curry hoin Golden State an chak

Stephen Curry-a point 29 neih hmangin Golden State Warriors chuan Milwaukee Bucks 125-90 in an hneh a, match hmasa lama nasa taka an mualpho tawhna chu hliah khuh tumin thapui an thawh tih a lang.

NBA champion vawi sarih ni tawh Golden State hian Boston Celtics an ngam lo hle a, an hniam zawkna chu point 52 ngawt a tling - GSW tan mualphona a ni a, tun ṭumah hian chak lo zui ni se la chuan sawiselna an dawng hnem zual ngeiin a rinawm.

Nimin zing inkhelah erawh a bul an ṭan fuh takzet - quarter hmasa berah point 40 an nei tling nghal, quarter pali zinga pathumnaah hniam zawk mah se a dang pathumah an sang zawk vek a, an phu ang ngeiin hnehna an chang.

Chase Center, San Francisco-a hnehna an chan hnuah Curry chuan, "Kan tan chuan hetiang baka thawhlehna ṭha hi a awm thei tawh chuang lo ang. NBA khawvelah chuan mualpho leh hnehna chan hi tawn chang a awm ve ṭhin.

"Boston lakah khan kan che fuh lo takzet a, chumi hnuah inrintawkna sang tak nena kan khel zui leh thei mai hi a lawmawm lai chu a ni," a ti. All-Star neih hnuah tluang takin an kal a, chumi hnuah chesual zauh mah se an insiamṭha leh ta.

Milwaukee Bucks tan Giannis Antetokounmpo chuan poinr 23 a nei ve thung a, mahse hnehna chan nan a tawk zo lo. A team Bucks hian season kal laiah vawi 41 hnehna chang tawhin Eastern Conference-ah pahnihna an ni chhunzawm.

Golden State Warriors erawh tluk leh din fawma season hmang an ni a, ṭum 33 chak ve tawh mah se vawi 28 ngawt an tlawm tawh avangin Western Conference-ah pakuana an ni mek.

Inkhel dangah Orlando Magic chuan a zawna vawi nga an chakna ni turin Washington Wizards chu 119-109 in an hneh, an chak theih nan point 28 neitu Franz Wagner a che ṭha hle, quarter hnihna an khelh laiin point 21 ngawtin hniam zawk hman mah se an tho chhuak leh a ni.

Los Angeles Clippers pawh point 20 zeta an hniam zawk hnuah Houston Rockets 122-116 in an hneh a, inkhel dangah Los Angeles Lakers chuan 130-120 in Sacramento Kings an ngam lo thung.