Neutral athlete nih hreh lo - Medvedev

Paris Olympic neih turah Daniil Medvedev chu an ram Russia hmingin a inlan thei dawn lo, world number 4 hian a ṭul a nih chuan ram bik nei lo 'neutral athlete' ni chunga infiamna khawmpui lian hmachhawn a hreh lo.

Russia leh Ukraine an indo a, hei vang hian Russia leh a thurualpui Belarus chu infiamna peng hrang hrangah hrem an ni. Tun hnai khan International Tennis Federation (ITF) chuan ram pahnih aṭanga player inlan turte chu an ram hminga an tel theih loh tur thu an sawi.

Medvedev chuan, "A theih a nih phawt chuan Olympic khelh ngei ka duh a, singles leh doubles pawh khelh ngei ka duh bawk. Japan khawpui Tokyo-ah khan Olympic ka lo khel tawh, a boruak kha infiamna ka khelh tawha danglam leh lian a ni phak.

"Kan tan dan leh hrai an siam a nih chuan ka zawm a ngai a ni mai, hnam puanzar hnuaiah khel ve thei lo mah ila tennis tho kan khel dawn a, player ṭha chuan champion a tum tho tur a ni ang," tiin a sawi.

Russia leh Belarus mipa leh hmeichhe player-te hi ram leh ram inelna chauh ni loin, mimal inelna an hmachhawn ṭum pawhin an ram hming dah lansak an ni ngai lo, an tan thil thar a ni tawh hran lo.