Odisha an zawr

Asian football-a club inelna sang ber dawttu, AFC Cup-ah nimin khan Odisha an inlan a, inter-zone playoff semifinal (quarterfinal tlukpui) ah A League club Central Coast Mariners chu 4-0 ngawtin an ngam lo.

New South Wales, Australia-a inkhelah Mariners tan Mikael Doka chuan goal hnih khungin, Storm Roux leh Ronald Barcellos ten goal khat ve ve an khung bawk a, ISL hmahruaitu Odisha-in a chhanletna tur an neih loh avangin an tlawm.

March 14, Ningani zanah Odisha hian second leg khel turin Australian club hi an la mikhual ve leh dawn a, A League table-a pahnihna ni mek team lakah goal an chhuah hnem hret avangin tlang tur chuan thilmak a thlen tel a ngai tawh ang.

Nimina inkhelah hian Odisha tan Jerry Lalrinzuala, Isak Vanlalruatfela leh K. Lalṭhathanga (Puitea) te chuan inkhel bul an ṭan vek.