Chak vek thei awm chhun Arsenal

Europa League group match khelh zawh a ni a, match ruk ṭheuh an khelh aṭangin Arsenal chu chak kim thei awmchhun an ni. Mikel Areta naute hian point 18 hmuin group B hmahruaitu an ni.

Tottenham Hotspur pawhin an match hnuhnung berah Royal Antwerp 2-0 in an hneh a, Jose Mourinho naute hian point 13 hmuin group J hmahruaitu ni chungin last 32 an lut ve bawk.

Group tina a sang pahnihten knockout stage an lut a, Champions League aṭangin group stage paltlang zo lo - Manchester United, Shakhtar Donetsk, Club Brugge, Ajax, Krasnodar, Red Bull Salzburg, Olympiakos leh Dinamo Kiev ten an zawm bawk ang.

Arsenal chuan an mikhualna ramah Dundalk 4-2 in an hneh a, tun hnaia sawisel hlawh manager Arteta chuan a player ṭhenkhat hahchawlhna hun pe chunga an chak chu a lawm thu a sawi chhuak.

Aviva Stadium a inkhelah Gunners tan hian Eddie Nketiah, Mohamed Elneny, Joe Willock leh Folarin Balogun ten goal khat ṭheuh an khung. Mualneitu lam tana Jordan Flores leh Sean Hoare te goal khungin awmzia a nei lo.

Arteta chuan, "Inkhel thunun chungin hnehna kan chang a, ka naute khelh danah ka lungawi hle. Tunah chuan Europa League chu kan dahṭha rih ang, a chhan chu nakkum February thlaah kan khel chhunzawm leh chauh dawn.

"Player hliam ṭhenkhat an dam a, beiseina nen hmalam hun kan thlir zel ang," a ti. Gunners hian Pathianni zan dar 12:45-ah Premier League khel turin Burnley an mikhual zui leh nghal dawn a ni.

Carlos Vinicius leh Giovani lo Celso te goal hmangin Tottenham an chak a, inkhelh banah manager Mourinho chuan tun hma lama a tih fo tawh angin thu dengkhawng leh danglam tak a sawi chhuak.

Portuguese manager hian Premier League lamah player chhawr rim bik a nei a, league hmahruaitu an nih avangin fak a hlawh. Europa League-ah Harry Kane leh Son Heung-min te a chawlhtir laiin Gareth Bale, Vinicius leh Harry Winks te tan hun ṭha a ni ve thung.

Mourinho chuan, "Squad pumpui a hlim vek theih loh. Hnehna kan chan avangin player zawng zawng an hlim ka ring, mahse ṭhenkhat chu an khelh loh avangin kawng dangah an lawm lo ang. Khawi club-ah pawh player inkhel lo chu an lawm ngai lo," a ti.

Spurs hian beiseina sang tak nen Real Madrid aṭangin Bale an hawh let a, an duh ang chhanna erawh an la hmu lo. Europa League lamah Bale hi chhawr ṭhin a ni a, Premier League atan erawh hmun a la chang phak lo.

Steven Gerrard-a enkawl Rangers chuan Lech Poznan 2-0 in an luhchhuah a, point 14 hmuin group D hmahruaitu an ni. Last 32 draw neih hunah seeded an ni thei dawn a, team lian ṭhenkhat chu an pumpelh thei dawn tihna a ni.

Inkhel dangah Napoli chu an mikhual Real Sociedad nen 1-1 in an inhnehtawk, Italian club leh Spanish club hian last 32 an lut. Gennaro Gattuso naute hian chawlhlawk hmain Piotr Zielinski hmangin goal an khung a, an chakpui dawn niin lang mah se hun tawp hma chiahin Willian Jose-a'n a sut.

Italian club dang AC Milan chuan khualmualah Sparta Prague 1-0 in an hneh a, striker Zlatan Ibrahimovic awm loh karah Dominic Plechaty chuan goal awmchhun a khung a, point 13 hmuin group H hmahruaitu an ni.

Serie A hmahruaitu Milan manager Stefano Pioli chuan, "Ṭha takin season bul kan ṭan a, tuna kan result ṭha ang hi Krismas thleng neih phawt kan tum ang. Chawlh rei lote kan nei dawn, chumi hnuah chuan rilru tharin a ṭha lehzual zawka kal kan tum ang," 

tiin a sawi.