Anfield-ah Man United lenglut dawn

Liverpool-in match 22 an khelh tawh aṭangin hneh loh an la tawng lo a, Manchester United lakah point hnih an hloh tih loh chu an la chak vek. 

Pathianni zan dar 10:00 hian Anfield-ah Ole Gunnar Solskjaer-a hote an lenglut dawn a, Jurgen Klopp-a hoten an hmaa inchhawp Premier League nomawi tih hlut belhchhah nan an hmelma team Man United hi hneh ngei an tum ang. 

Old Trafford-ah Manchester United-in Marcus Rashford-a goal hmangin Liverpool hneh turah an inngai a, amaherawhchu minute 85-naah Adam Lallana-a'n Reds siphurh a sut. 

Statistics thlirin Klopp-a hoten 68% ball possession an neih avangin chak an phu a, chutihrualin an goal chance neih ṭhat dan leh an goal khung hun thlirin United chu point thum hmu awm zawk an ni. October thlaa an inkhelh ṭum hian Paul Pogba chu hliam vangin a tel thei lo a, tun ṭumah pawh French international hi hliam vang thoin a thei dawn lo. United harsatna belhchhah turin Rashford-a dinhmun a chiang lo bawk. Solskjaer chuan, "Rashford-a dinhmun hi la enfiah tur a ni a, a khelh theih ka ring lo mah se minute 48 hun a la awm," tiin inlan thut thei a nih thu a sawi.

Manchester United-in season ṭantirhah Ashley Young chu captain atan an ruat a, English defender hian Inter Milan a pan dawn takah chuan Harry Maguire-a chu United captain tur a ni. Solskjaer chuan, "Harry hi captain a ni dawn. A chet danah hian hruaitu a ni tih ka chiang a, armband a hreng chhunzawm zel ang," tiin a sawi.

Maguire hian Liverpool tlarhma a hmachhawn nghal dawn a, an match hnuhnung pahniha goal chhuah lo United tan 'clean sheet' chhunzawm beisei ngam a har dawn. 

Reds hian tlarhmaah Roberto Firmino, Mohamed Salah leh Sadio Mane te an nei a, goal khung harsat ṭumah pawh tu emaw ber hi a hun takah an inlar ṭhin avangin Klopp-a hote hi chak zawk tura ngaih an ni.

Liverpool tan chanchin ṭha a thlen belh zel a; Joel Matip, Fabinho leh Dejan Lovren ten tunkar khan training an zawm tawh. Jurgen Klopp-a hote hian inhliam nei chungin Krismas leh kumthar vuakveta fixtures hautak an paltlang thei a, an elpui ber Manchester City meuh pawh 3-1 in an hneh.

Jurgen Klopp chuan, "Pathiannia United nen kan inkhelh tura mipui beiseina hi kan hria a, tih hlawhtlinsak ngei kan tum ang," tiin a sawi a, inkhel thunun chunga chak an tumah a ngaih theih. Reds hian hnehna an chang a nih chuan zanin inkhela Manchester City-in Crystal Palace an hneh a nih pawhin point 14 thoin hma an hruai leh ang.