Tu nge champion dawn? Liverpool vs City

Premier League hmahruaitu chu Liverpool an ni a, an hnuai chiaha awm chu Manchester City an ni. Team pahnih inkara point awm zat chu point khat a ni a, vawi khat chetsualah an dinhmun a la inthlak hlawk thei tihna a ni.

Pathianni zan dar 9:15-ah Liverpool hian City an mikhual dawn a, 'Premier League final' tia kan sawi a nih pawhin sawi uar lutuk kan ni lo ang - pathumnaa awm Arsenal theihnghilh erawh a thiang lo.

Point hniha Liverpool phak lotu Arsenal duhthusam chu chak zawk awm loa an ṭin a ni ngei ang a, mahse, team pahnih hian point khata lungawi an duh dawn lo - hei tak hi inkhel tihmuhnawmtu tur a ni.

Jurgen Klopp leh Pep Guardiola inelna thawnthu ngaihnawm hi nakin thlenga an la sawi tur a ni a, mahse, Klopp a chhuah dawn avangin season tharah kan hmu tawh dawn lo. Coach pahnihin point thum nen an inkar inelna hi mangṭha an duh dawn a, zaninah inkhel hmuhnawm hmu turin inring rawh le!

Inbuatsaihna

Liverpool-in Ningani zan khan Europa League round of 16 an khel a, 5-1 in an sawp - Reds tan Darwin Nunez chuan goal hnih khungin, Alexis Mac Allister (penalty), Luis Díaz leh Dominik Szoboszlai ten goal khat ṭheuh an khung bawk.

City hmachhawn tura Liverpool inbuatsaihna a ṭha a, Klopp tana lawmna tizual tur chu a player inhliam an dam ṭan. Mohamed Salah pawh bench aṭangin a lut ve leh ta a, a goal khung chu offside vangin pawm a ni lo thung.

Pep leh a naute pawh an inpuahchah ṭha - Nilaini zan khan Champions League round of 16-ah Copenhagen chu 3-1 ngawtin an sawp a, City tan Manuel Akanji, Julian Alvarez leh Erling Haaland ten goal khat ṭheuh an khung.

Haaland a 'form' chho leh tawh a, Pep-a'n Reds nena an inkhel tur thlir lawkin Kevin de Bruyne, Bernardo Silva, Phil Foden leh Kyle Walker te ho bench-ah a dah thei bawk a, inelna hrang hranga a zawna match nga chak tawh City hi Liverpool hmachhawn turin an inpeih.

A 'hot' ṭan

Liverpool fullback Trent Alexander-Arnold chuan tun hnai khan, "Nakinah chuan vawiin kan hun tawn hi kan la thlirkir ang a, City hian keini aiin nomawi chawi hnem mah se, sum leh pai lama club pahnih dinhmun thlirin kan hlawhtlinna hian ngaihhlut a la hlawh zawk ang," a ti!

Hliam vanga chawl mek Arnold-a ṭawngkamin City beng a thleng a, an la na hle. A bik takin striker Haaland a ṭawng na a, Norwegian striker chuan, "A thusawi hian ka tan awmzia a nei lo a, treble champion nih awmzia a la hre ve lo," a ti deuh kher.

City defender Ruben Dias chuan, "Mahni thlirna aṭanga midang hlawhtlinna lo sawi nep hi club lian tan chuan tih loh tur a ni," a ti a, a la na tih a hriat. Liverpool lam an ngawi a, mahse, khelmualah City ka hi hupsak an duh dawn.

Tun season-ah team pahnih hi vawi khat an lo intawng tawh a, 1-1 in an inhnehtawk. Kha inkhela goal khungtu Arnold chu hliam vangin a inlan thei dawn lo a, City tana khungtu Haaland erawh a dam ṭha e.

Ṭha leh ṭha

Liverpool-in keeper Alisson an la chhawr thei lo a, Caoimhin Kelleher-a tan eng ang taka ṭha nge a nih, pholan hun a ni. Sparta lakah Ibrahima Konate chu hliam vanga lakchhuah a ngai a, a dinhmun tur a la sawi theih loh - a inlan theih loh chuan Jarell Quansah leh Virgil van Dijk an inkawp ang a, Andy Robertson leh Conor Bradley an ding thei bawk ang.

Midfield-ah Wataru Endo, Szoboszlai leh Mac Allister te inkawp thei tawh tur hi Liverpool tan hahdamna a tling a, tlarhmaah Salah hoin Diaz leh Nunez te an inkawp ang - City tlarhnung tan fimkhur a ṭul dawn.

City-ah player langsar inhliam sawi tur an awm lo. Tlarhmaah Haaland mal tlatin, mual sir aṭanga thlawp turin Jeremy Doku leh Foden an awm a, midfield-ah Silva leh KDB an awm chhung chu City tan thlaphanna tur a awm lo.

Midfield-a Liverpool hnathawh lo dang chat turin John Stones leh Rodri ten defensive midfielder hna an chelh leh ang a, tlarhnungah Dias, Walker leh Nathan Ake awmin, Ederson-a'n si ban a nghak leh ang.