Arteta-a'n an chet ṭhat chhan a sawi

Arsenal manager Mikel Arteta chuan tun hnaia an boruak ṭha leh an chet ṭhat chhan chu player inlungrual vang a ni tih a sawi a, zanin dar 11:00 a Brentford nen Premier League an khelh hunah pawh chak leh ngei a inring.

Nikum krismas vuak vetah khan Gunners hian goal khung an harsat a, league hmahruaitu ni zuai zuai hman mah se an tlahniam leh duai. Kuminah erawh an insiamṭha a, an player ngai tho hmangin goal an khung ta zawt zawt mai a ni.

Arteta chuan, "A chhan lian tak chu tawnhriat kan nei ta hi a ni. Player-te an awmkhawm rei tial tial a, kan khelh duh dan kalphung pawh an thiam bel zel. Anmahni chauh ni loin an ṭhiante ṭhat dan pawh an hre tawh.

"Awmkhawm tam a, inpawh leh innel taka thil tih hian rah ṭha a chhuah ṭhin, chuvangin khelmual chhungah result kan nei ṭha," a ti. North London club hian khualmualah phei chuan league match an khelh hnuhnung pathumah goal nga an khung tling vek.

Tun hnaia Arsenal hmelhmang tidanglamtu langsar tak chu Kai Havertz a ni. Chelsea aṭanga an lakluh German forward hi tlarhma laiah dah ṭhin a ni a, an khingpui tlarhnung tibuaitu ber a nih bakah goal a khung ta zauh zauh bawk.

Spanish manager Arteta chuan, "Awmna tur a thlang thiam a, a taksa a chakin a thluak a fim bawk. Inkhel kal hmang thlak hun a hria a, a chevel hian kan khingpui player a tibuai ṭhin," tiin a sawi.

Arsenal hian zaninah hnehna an chang a nih chuan Premier League hmahruaitu an ni lailawk dawn. Pathianni zanah an elpui Manchester City leh Liverpool an inkhel dawn, an inhnehtawk a nih chuan Gunners hi a chung berah an awm tlang ang.

Arteta chuan, "Reds leh Citizens inkhel tur hian min nghawng lem lo, ka fate nen nuam titakin kan lo en ang," tiin Man City leh Liverpool inkhel tur chungchang a sawi.