FIFA Santosh Trophy 2024 : Goa-in Manipur beiseina titawp; Final-ah Goa vs Services
77th National Football Championship for Santosh Trophy final chu zanin dar 7:00 hian Golden Jubilee Stadium, Yupia-ah Goa leh Services ten an khel dawn. Dream final tia football ngainatuten an beisei Manipur leh Mizoram a thleng ta lo a, NorthEast football powerhouse pahnih tawpna chu semifinal a ni.
Santosh Trophy-ah Services hi vawi ruk champion tawhin an champion hnuhnun ber chu kum 2019 kha a ni. Goa hi vawi nga champion tawh an ni thung a, tun ṭuma an champion theih chuan Services record an nih rual thei dawn. Final hi Arunachal Pradesh Football Association YouTube channnel-ah a en theih ang.
Tlawm duh lo Goa
March 7, Ningani zan inkhelah Manipur leh Goa an inhmachhawn a, team pahnih hian an intawn hma hian chak loh an la nei lo ve ve. Goa-in khelh dan nghet ṭha tak an nei a, goal chance pawh insiam mah se goal khung hmasa zawk chu Manipur an ni.
Ngangbam Pacha Singh-a'n minute 18-naah hla tak aṭangin a pet goal a, Manipur ṭantute thawm a ring. Manipur hi quarterfinal china inelna hmang ṭha bera ngaih theih an nih avangin 2023 National Games final rematch thleng turah a ngaih theih.
Mahse, Goa-in tlawm mai an tum lo. Na takin Manipur an nawr chhunzawm a, goal erawh an khung thei bik lo. Injury time-ah pawh minute ruknaah Necio Maristo Fernandes-a'n box chhung aṭangin a back volley lut a, ball hian goal ban a per hnuah goalline hrulah kal mah se goal pawna chhuak loin goal-ah a lut.
Minute 90 chhungin chak zawk an awm lo a, extra time khelh zui a ni. Extra time-ah team pahnih an inkhel tawk a, si phurh sutna goal khungtu Necio-a'n minute 116-naah chakna goal a khung.
Goa-in 2-1 a hma an hruai hnu hian Manipur-in risk an la a, na taka an nawr avangin goal pawh an khung teuh hle. Goa keeper Antonio dan ṭhat zarah an him hram a, hun tawp hma hretin Manipur player Sushilkumar Singh chu hnawhchhuah a ni.
Goa vs Services
Services hi group hmahruaitu ni chunga knockout stage lut ni mah se Goa hian hneh loh an tawn loh bakah group stage-ah Services hi 2-1 in an hneh. An intawn hmasak zawk ṭum hian Goa tan Lloyd Cardozo leh Joshua D'silva ten goal an khung a, injury time-ah Services tan Christopher Kamei-a'n si phurh a sut ṭhen. Chutihrualin inkhelah erawh team pahnih an intluk tawk hle.
Final-a chak tur rin thiam a harsa a, inhliam dinhmunin result a thlak danglam thei bawk. Santosh Trophy-ah hian match kar danah ni khat chauh chawlh a ni a, group A team vanneihna chu quarterfinal hmain ni hnih an awl thei a, semifinal hmain ni hnih tho an awl. Chutihrualin fitness nei ṭha ber tura ngaih Services pawh hliam vangin an buai ve tho.
Services winger Bidhyasagar Singh chu hliam vangin final-ah a dinhmun a chiang lo a, Mizoram nen an inkhelh ṭumin hliam vangin captain Christopher lakchhuah a ni bawk. Buaina belhchhah turin Services kulhpui Zothanpuia (Thangpuia) chu hnawhchhuah a ni a, Thangpuia tel lohna Services tlarhnung chu a phui tawk lo. Malsawmfela tihtluk vanga yellow card hmutu Samananda chu hrem vangin final-ah a inlan thei dawn lo bawk.
Dam kim ṭhap ve veah Services hi team ṭha zawka ngaih an ni a, mahse Thangpuia leh Samananda khel thei lo tur leh Christopher-a dinhmun chiang lo avangin Goa hi tun dihmunah chuan an buk a rit ta zawk.
Services ṭhatna
Services-in Santosh Trophy-ah record ṭha tak an nei a, team ṭha zingah an tel ziah. Player ṭha la khawm thei team an nih avanga ṭha an ni tih chu a chiang a, chutihrualin Santosh Trophy hi an kaisanna atana pawimawh a nih avangin an ngai hlu bawk.
Santosh Trophy-a semifinal an thlen hian havildar-ah an kaisang a, tun ṭuma kal zinga havildar-a la kaisang lo zawng pawh hi semifinal an thlen phak avangin havildar-ah an kaisang vek dawn.
Hei vang hian Army, Navy leh Air Force player-ten Services aiawha khelh hi an châk a, inelna an hmachhawn hnuah pawh kaisan ngei tumin team tan an theihna zawng zawng an hlan ṭhin. Mizoramah erawh a letling thung a, Police player-ten Santosh Trophy khelh vanga hamṭhatna hranpa an neih loh avangin kal loh hi player ṭhahnem zawk duh dan a ni.