Club thuenitu lamin Tuchel an thlawp

Bayern Munich president Herbert Hainer chuan tun hnai khan Thomas Tuchel chu coach ṭha tak a nih thu a sawi a, beisei angin season hmang ṭha chiah lo mah se an manager hi an ban mai dawn lo niin a lang.

Bavarians hian a zawna seaason 11 an lak tawh Bundesliga title chu hloh thei dinhmunah an ding mek. Champions League-ah erawh dinhmun ṭha lo zawka an din hnuah Lazio lehthalin quarterfinal an lut.

Hainer-a chuan, "Thomas Tuchel hi coach ṭha, thil tuma chiang leh hmathlir nei thui tak a ni a, tun season chu ani hoa hun hman zawh hi kan duh dan a ni," tiin tun season atan chuan an ban dawn lo tih a sawi, season thar an zawhna erawh a chhang thei lo thung.

Bayern Munich hian zanin dar 8:00 hian Mainz chu Allianz Arena-ah an mikhual dawn a, an chak a nih chuan an chunga awm Bayer Leverkusen nen an inkar an sawrzim leh rih dawn a ni.

Xabi Alonso enkawl Leverkusen hian tun dinhmunah Bayern aiin point 10 ngawtin an hmu hnem mek - anni hian Pathianni zanah Wolfsburg an tum thung ang.