Inkhel tur chiah ka ngaihtuah - Carlo Ancelotti

Tun hnaia Spain thuneituten chhiah awl rua an puh Carlo Ancelotti chuan a thubuaiin a tihbuai loh thu a sawi a, "Ka rilruah engmah nghawng a nei lo a, 'Engtin nge kan team hi tun aia hma kan sawn theih ang aw, tih chu ka ngaihtuah ber,' a ni," a ti a, inkhel chiahin a rilru a luah.

Ancelotti hi Spain rama sorkar dan hremite chuan a chhiah awl ruk avangin kum li leh thla kua tal lung ina tang turin an duh a, 2014-15 season-a Real a enkawl laia chhiah awl rua puh coach hian £854,000 a chawi dawn bawk.

Italian coach ropui Ancelotti hian 2013-15 inkarah khan Real hi a lo enkawl tawh a, kum 2021 khan a vawi hnih nan a kir. Chhiah awl rua an puh hi Madrid-a hun a hman hmasak lai a ni a, mahse, King Carlo hian dan ang thlapa engkim a tih thu a sawi.

Ancelotti hi euro maktaduai tel chhiah awl ruah puh a ni a, Spain-a a awm hmasak hian image rights aṭanga a sum hmuhte tarlang loin, Real aṭanga a hlawh chiah tarlangah an puh. Footballer leh coach te hian football piah lama an sumdawnna buaipui turin company an nei ṭhin a, Ancelotti chuan heta ṭanga a sum hmuh hi a tarlang lo niin thuneitute chuan sawi a ni.

Kum 64 mi coach chuan, "Thuneitu lam hian kum 2015-ah khan Madrid khawpuia awm nghet angah min ngai a, chutiang ang chuan chhiah chawi turin min beisei. Kei erawh chuan chutianga Madrid khaw miah ka inchhiar lo thung. Ka ukilten hma an la a, engkim a fel thuai ka beisei," a ti a, sum chawi tur chu a chawi tawh thu a sawi bawk.

Chhiah awl ruk chungchangah thubuai nei mah se Ancelotti a buai phah lo - La Liga-ah point sarihin Real Madrid chu hma a hruai falpui a, thubuai a neih thu a hriat hnu lawkah Madrid khaw club hian Champions League quarterfinal an lut bawk.

Spain-ah hian chhiah awl rua footballer leh coach te puh an nih vawi khatna a ni hran lo a, thil thar a ni lo. Kum 2017 khan Barcelona player ropui Lionel Messi chu thla 21 tang turin thiam loh chantir a lo ni tawh a, mahse, a hnuah pawisa chawitir a, ngaihdam a ni.

Real Madrid legend Cristiano Ronaldo chu thla 23 tang tura hrem a lo ni tawh bawk a, mahse, ani pawh hian sum chawi tur euro maktaduai 18.8 chawiin, lung in a tang lo. Spain-ah hian kum hnih aia tlem lung ina tang tura hrem an nihin lungin an tang kher ngai lo a, pawisa chawi hmangin an chingfel mai ṭhin.

Kum 2019-a Ronaldo hrem a nih hian Real boss hlui Jose Mourinho chu thiam loh chantir a lo ni tawh bawk. Ancelotti pawh hi lung in tang tura tih ni mah se, Real Coach a nih chhunzawm zel a rinawm zawk.

Real Madrid hian Pathianni zan dar 11:00-ah league match khel turin Celta Vigo an lenchilh zui dawn a, zanin dar 8:45-ah Atletico Madrid chuan Cadiz an lenchilh bawk ang. Nizan dar 1:30 khan Barcelona chuan Real Mallorca an mikhual a, result kan hre hman lo.