Ajax khelmuala goal khung lo Villa

Premier League-a beisei phak baka season duhawm hmangtu Aston Villa chuan Ningani zan khan Europa Conference League round of 16 first leg-ah Ajax an lenchilh a, 0-0 in an inhnehtawk.

Ajax khelmualah team pahnihin chance an nei mumal lo a, inkhela chance duhawm bera chhal ngam chu Kenneth Taylor ke bulah tlain, Villa keeper chhuanvawr Emiliano Martinez chuan ṭha zetin a dansak - Argentine keeper hnathawh hmuh hmaih a thiang lo.

Ningani zan inkhelah hian team pahnihin player 10-in hnu an khar ve ve a, Villa player Ezri Konsa chu minute 83-naah a yellow card pahnihna avanga hnawhchhuah a ni a, Ajax defender Tristan Gooijer pawh minute 86-naah a yellow card pahnihna avang thoa hnawhchhuah a ni.

March 14, Ningani zanah Villa hian second leg khel turin Ajax hi an mikhual leh dawn a, an inringtawk khawp ang - Villa Park-ah hian league match 15 chhung chu a zawnin tlawm an nei tawh lo a, heng zingah hian Manchester City leh Arsenal an hneh a tel! Hetihlai hian Ajax erawh Europa League-ah khualmuala match thum an khelah an chak zo lo vek a, ECL lamah hian an tla thla a ni.