Premier League referee tur Sunny Singh

Indian mi, Britain-a piang leh sei lian Sunny Singh Gill chuan zanin dar 8:30-a Crystal Palace leh Luton Town inkhelh hunah referee hna a chelh dawn a, British South Asian zinga Premier League-a referee hmasa ber a ni dawn.

Singh Gill-a pa Jarnail Singh pawh referee tho niin, English Football League-ah 2004-2010 inkar khan match 150 chuang a enkawl a ni - Jarnail hi turban-a lu tuam chunga EFL-a referee hna thawk hmasa ber leh awmchhun a la ni reng a ni.

Hetihlai hian Sunny Singh-a unaupa Bhupinder chuan January 2023 khan Southampton leh Nottingham Forest inkhelah assistant referee hna a thawk a, Sikh-Punjabi zinga assistant referee hmasa ber a lo ni tawh.

Kum 39 mi Sunny Singh Gill hian a naupan tet aṭangin referee hna hi a lo thawk ṭan tawh a, kum 17 a nih laiin Sunday League-ah referee a lo ni daih tawh. Kum 2021 khan a unaupa Bhupinder nen Championship match-ah an lo thawk dun tawh bawk.

Khawthlang media ṭhenkhatin an tarlan danin Premier League referee-te hian match khat an enkawlin £1,500 (Rs.1,57,801) vel an hlawh ṭhin a, la junior deuh hoin kum khatah £70,000 (Rs. 73,63,891) hlawhin, kum khata £200,000 (Rs. 210,38,560) hlawh phakte pawh an awm.