Inrintawkna kan nei - Pirlo

Juventus manager Andrea Pirlo chuan Barcelona an hneh chuan inrintawkna nasa tak a siamsak thu a sawi a, a bik takin a player duh lai Cristiano Ronaldo tan a pawimawh bik hle tih a sawi tel bawk.

Old Lady hian manager thar Pirlo kaihhruaina hnuaiah beisei an phak lo. Serie A nomawi an kawl lai hloh mai thei dinhmunah an ding mek a, inelna sang Champions League lamah pawh a tir lamah an che ṭha tawk lo.

Mahse Italian champion hian Allianz Stadium a an ngam loh Catalan club chu Nou Camp-ah ngei an luhchhuah a, group hmahruaitu ni chungin last 16 an lut thei - Barca an hneh avangin an boruak a ṭha hle.

Pirlo chuan, "Barca kan khelh ṭum khan player zawng zawng an khel ṭha vek a, kan chak khan inrintawkna min siamsak nasa hle. Ka naute chungah rinna ka nghat ngam a, ka rin ang ngeiin an khel chhuak mek a ni.

"Kan zin kawngah hian chet fuh leh fuh loh chang a awm thei, harsatna kan tawh chang pawhin hnual loa hmalam en zel a pawimawh. Barca kan hneh khan phurna nasa tak min siam avangin Serie A lamah pawh result ṭha kan neih chhunzawm ka beisei," a ti.

A zawna Serie A vawi kua champion tawh Juve hian point 20 hmuin table-ah palina an ni mek. Hmahruaitu AC Milan an phak lohna chu point ruk a ni a, khelh hmabak an la ngah avangin an dinhmun a la inthlak danglam thei tih erawh a chiang.

Juventus hian Pathianni zan dar 10:30 hian Genoa an lenchilh dawn a ni.