Match hmasa berah Raducanu a chak

Emma Raducanu chuan nimin khan Indian Wells a match hmasa ber a khel a, a khingpui Rebeka Masarova chu 6-2, 6-3 a hnehin second round a inhlangkai.

Kum 21 mi Raducanu hian a duhthusam ang tak chuan a la khel ṭha lo, tun hma lama a service hlauhawm tak ang kha a la nei thei chiah lo, chutihrualin hliam leh harsatna dang nei loin nuam ti tak erawh chuan a inkhel thei tawh thung.

Britain nula Raducanu chuan, "Indian Wells hi chu a boruak a danglam, ball kal dan hi hriatthiam a harsa ṭhin hle. Thli a thaw nasa a, boruak a chet miau chuan teh sual a awlsam bik," a ti.

Inkhel dangah Naomi Osaka chuan Sara Errani lakah 6-3, 6-1 in hnehna a chang a, Caroline Wozniacki pawhin Zhu Lin chu 7-6 (6), 6-1 in a hneh ve bawk a, anni pathum hi champion thei tura rinkai zinga mi an ni.